ആ രാത്രിയിൽ 2 [പ്രൊഫസർ ബ്രോ] 172

“ദേവാ…”

ദേവൻ എപ്പോഴും രാജനെ ഏട്ടാ എന്ന് മാത്രമേ വിളിക്കാറുള്ളു എങ്കിലും രാജൻ ആദ്യമായി ആയിരുന്നു അവനെ പേര് വിളിക്കുന്നത്. അപ്രതീക്ഷിതമായുള്ള ആ വിളിയിൽ അവൻ നിശബ്ദനായിപ്പോയി

“മോൾ ചായ എടുത്തോ ഞങ്ങൾ വരാം…”

“രാജേട്ടാ…”

ദേവൻ ദയനീയമായി രാജന്റെ മുഖത്തേക്ക് നോക്കി,  അവന്റെ വിളിയെ അവഗണിച്ചുകൊണ്ട് രാജൻ ഗംഗയുടെ പിന്നാലെ അവളുടെ വീടിന്റെ അരികിലേക്ക് നടന്നു

ഉമ്മറത്തെത്തിയ രാജൻ തിരിഞ്ഞു നോക്കിയപ്പോഴും ദേവൻ റോഡിൽ തന്നെ നിൽക്കുകയായിരുന്നു.

രാജൻ കണ്ണെടുക്കാതെ ദേവനെ തന്നെ നോക്കിനിന്നു. രാജന്റെ മുഖത്തു നോക്കാൻ ആകാതെ ദേവൻ മുഖം തിരിച്ചു ബൊലേറോയുടെ അടുത്തേക്ക് നടന്നു. അവിടെ എത്തിയപ്പോഴും രാജൻ തന്നെ തന്നെ നോക്കി നിൽക്കുകയാണ് എന്ന് കണ്ടതും ദേഷ്യത്തോടെ ബൂട്ട്കൊണ്ട് നിലത്തു ശക്തിയായി ആഞ്ഞു ചവിട്ടിയതിനു ശേഷം അവൻ രാജന്റെ അരികിലേക്ക് നടന്നു തുടങ്ങി

ദേവൻ തന്റെ അരികിലേക്ക് വരുന്നത് കണ്ടതും രാജൻ മുഖം തിരിച്ചു. ആ സമയത്ത് അയാളുടെ ചുണ്ടിൽ ഉണ്ടായിരുന്ന പുഞ്ചിരി അവൻ കണ്ടില്ല

“ഇരിക്കൂ സർ…”

സോഫയിൽ അലക്ഷ്യമായി കിടന്ന മാസികകളും ന്യൂസ്‌ പേപ്പറുകളും കയ്യിൽ എടുത്തതിനു ശേഷം ഗംഗ രാജനെ ഉള്ളിലേക്ക് ക്ഷണിച്ചു

“വാ സാർ…”

അകത്തേക്കു കയറാൻ മടിച്ചുനിന്ന ദേവനെ രാജൻ ഉള്ളിലേക്ക് വിളിച്ചതും ഗംഗ അടുക്കളയിലേക്ക് നീങ്ങി

അല്പം മടിയോടെ തന്നെയാണ് ദേവൻ രാജന്റെ അരികിൽ ഇരുന്നത്, തന്റെ അടുത്തിരുന്ന ദേവന്റെ പുറത്ത് രാജൻ പതിയെ തട്ടിക്കൊടുത്തു

സോഫയിൽ ഇരുന്ന ദേവന്റെ കണ്ണുകൾ ആ ഹാളിൽ മുഴുവൻ ഓടിനടന്നു

പുറമെനിന്ന് കാണുന്നത് പോലെ തന്നെയായിരുന്നു ഉള്ളിലും. അടുക്കും ചിട്ടയും ഇല്ലാതെ വാരിവലിച്ചിട്ടിരിക്കുന്നു. ടേബിളിൽ ഒരു പാതി മുറിച്ച ന്യൂസ്‌ പേപ്പറും കത്രികയും ഇരിക്കുന്നു അടുത്തായി ഒരു ഫയലും