ആ രാത്രിയിൽ 2 [പ്രൊഫസർ ബ്രോ] 172

എന്റെ ഏറ്റവും അടുത്ത സുഹൃത്ത് എന്റെ അമ്മ തന്നെ ആയിരുന്നു, രാവിലെ എഴുന്നേൽപ്പിക്കുന്നത് മുതൽ സ്കൂളിൽ പോകുന്നത് വരെ മുഴുവൻ സമയവും എന്റെ ഒപ്പം തന്നെ ആയിരുന്നു, സ്കൂൾ ബസ്സിൽ കയറുന്നതിനു മുൻപായി അമ്മ എന്റെ നെറ്റിയിൽ ചുംബിക്കുമായിരുന്നു ,

വൈകിട്ട് നാലരക്ക് എന്റെ സ്കൂൾ ബസ്സും കാത്ത് നിൽക്കുന്ന അമ്മയുടെ മുഖം ഇന്നും എന്റെ മനസ്സിൽ ഉണ്ട്, തിരിച്ചു വന്നു എന്നെ കണ്ടാൽ ഉടൻ എന്നെ വാരിയെടുത്തു എന്റെ മുഖം മുഴുവൻ അമ്മ ചുംബനങ്ങളാൽ മൂടുമായിരുന്നു

അന്ന് എന്റെ പത്താം ജന്മദിനം ആയിരുന്നു. വൈകിട്ട് തിരിച്ചെത്തിയാൽ ആഘോഷിക്കാം എന്ന് അച്ഛനും അമ്മയും ഉറപ്പ് പറഞ്ഞതുകൊണ്ടാണ്, അന്ന് ഞാൻ ക്ലാസ്സിൽ പോയത്

വൈകിട്ട് അച്ഛനും അമ്മയും ഒരുമിച്ചു എന്നെ കൂട്ടിക്കൊണ്ടുപോകാൻ വരും എന്ന് പ്രതീക്ഷിച്ചു കാത്തിരുന്ന എന്റെ അരികിലേക്ക് വന്നത് അടുത്ത വീട്ടിലെ വാസു ചേട്ടൻ ആയിരുന്നു,

വാസുച്ചേട്ടൻ വന്ന്‌ റ്റീച്ചറിനോട് എന്തൊക്കെയോ പറയുന്നതും ടീച്ചർ എന്നെ ഒരു സഹതാപത്തോടെ നോക്കുന്നതും എന്തിനാണെന്ന് എനിക്ക് മനസ്സിലായില്ല,

അന്ന് വാസുച്ചേട്ടന്റെ ഒപ്പം കാറിൽ വീട്ടിലേക്ക് പോകുമ്പോൾ വീട്ടിൽ എത്തിയാൽ ഉടൻ നടക്കാൻ പോകുന്ന ആഘോഷം ആയിരുന്നു എന്റെ മനസ്സ് മുഴുവൻ

മുറ്റത്ത് നിറയെ ആളുകളെ കണ്ടപ്പോൾ എന്റെ മനസ്സിൽ സന്തോഷം ആണുണ്ടായത്, എന്റെ പിറന്നാൾ ആഘോഷിക്കാൻ അച്ഛനും അമ്മയും വിളിച്ചു വരുത്തിയ ആളുകൾ ആണെന്ന് കരുതി. അവരെ വകഞ്ഞു മാറ്റി ഉമ്മറത്തേക്ക് എത്തിയപ്പോൾ ഞാൻ കണ്ടു ഭിത്തിയിൽ വലിയ അക്ഷരങ്ങളിൽ എഴുതിയിരിക്കുന്നു

// അമ്മയുടെയും അച്ഛയുടെയും മോനൂട്ടന് ഒരായിരം പിറന്നാൾ ആശംസകൾ… ഉമ്മ…//

അതിനടിയിൽ ഞങ്ങൾ മൂന്ന് പേരും നിൽക്കുന്ന ഒരു ഫോട്ടോ, വളരെ സന്തോഷത്തോടെയാണ് ഞാൻ ആ ഫോട്ടോക്ക് അരികിലേക്ക് ഓടിയത്, പക്ഷെ മാർഗ തടസമായി വെള്ള തുണിയിൽ പൊതിഞ്ഞ രണ്ട് വസ്തുക്കൾ കിടന്നത് അടുത്തെത്തിയപ്പോൾ ആണ് ഞാൻ കണ്ടത്

അതെന്താണെന്ന് എനിക്ക് മനസ്സിലായില്ല, പക്ഷെ അതിന് മനുഷ്യ ശരീരങ്ങളുടെ ആകൃതി ആയിരുന്നു,

ഞാൻ ആ വീട് മുഴുവൻ അച്ഛനെയും അമ്മയെയും അന്വേഷിച്ചു നടന്നു, അവസാനം വാസുച്ചേട്ടൻ ആണ് പറഞ്ഞത് അച്ഛനും അമ്മയും എന്നെ ഒറ്റക്കാക്കിയിട്ട് പോയി ഇനി ഒരിക്കലും വരില്ല എന്ന്…