ആ രാത്രിയിൽ 2 [പ്രൊഫസർ ബ്രോ] 172

ഗേറ്റിനരികിലേക്കെത്തിയ ഗംഗ ഗേറ്റ് വലിച്ചു തുറന്നു,

തുരുമ്പെടുത്ത ഗേറ്റ് തുറന്നപ്പോൾ ലോഹങ്ങൾ തമ്മിൽ ഉറഞ്ഞുണ്ടായ ശബ്ദം ദേവന് അരോചകമായി തോന്നി

“വളരെ നന്ദി ഉണ്ട് സർ…”

ദേവനെ കണ്ടിട്ടും അവനെ അവഗണിച്ചുകൊണ്ട് ഗംഗ രാജന്റെ അരികിലേക്ക് നടന്നു

“മോൾടെ കാലിന് വേദന മാറിയില്ലേ… ഹോസ്പിറ്റലിൽ പോകാൻ പറഞ്ഞതല്ലേ…”

രാജൻ ബൊലേറോ ഓഫ്‌ ചെയ്തുകൊണ്ട് ഡ്രൈവിംഗ് സീറ്റിൽ നിന്നും പറത്തിറങ്ങി

“കുറവുണ്ട് സർ… ചൂട് പിടിച്ചു, പിന്നെ മൂവും പുരട്ടിയിട്ടുണ്ട്”

“നാളെയും വേദന മാറിയില്ലെങ്കിൽ ഹോസ്പിറ്റലിൽ പോണം കേട്ടോ…”

“ശരി സർ…”

“ഖഹ്…ഖഹ് …”

രാജന്റെയും ഗംഗയുടെയും സംസാരം ശ്രദ്ധിച്ചുകൊണ്ടിരുന്ന ദേവൻ അവരുടെ ശ്രദ്ധ ക്ഷണിക്കാൻ എന്നോണം രണ്ട് വട്ടം ചുമച്ചു. ദേവനെ തിരിഞ്ഞുനോക്കിയ ഗംഗ വീണ്ടും രാജന്റെ മുഖത്തേക്ക് തന്നെ തന്റെ കണ്ണുകൾ പായിച്ചു

“രാജേട്ടാ… നിങ്ങൾ പറഞ്ഞിട്ടാ ഞാൻ വണ്ടി കൊണ്ട് വന്നത്… ദേ ഇരിക്കുന്നു വേണമെങ്കിൽ എടുത്തുകൊണ്ടു പോകാൻ പറ…”

ദേവൻ സ്കൂട്ടർ സ്റ്റാൻഡിൽ വച്ചുകൊണ്ട് പുറത്തിറങ്ങി, ഗംഗ തന്നെ ശ്രദ്ധിക്കാതെ അവഗണിക്കുന്നതിൽ ഉള്ള രോക്ഷം അവന്റെ മുഖത്തു പ്രകടമായിരുന്നു

“ഞാൻ ആരോടും കൊണ്ടുവരാൻ പറഞ്ഞില്ലല്ലോ… എന്തായാലും നന്ദി…”

ദേവന്റെയും ഗംഗയുടെയും സംസാരം കേട്ട് ചിരിക്കുകയായിരുന്നു രാജൻ

“വരൂ സർ… ഒരു ചായ കുടിച്ചിട്ട് പോകാം…”

“ആ മേഡം വിളിച്ചത് കേട്ടില്ലേ… ചെല്ല് സാറേ…,,,വീട് കണ്ടിട്ട് തൊഴുത്ത് പോലെ ഉണ്ട്. ചായ എന്ന് പറഞ്ഞു മിക്കവാറും കാടിവെള്ളം കലക്കി തരും…”

“അതിന് ഇയാളെ വിളിച്ചില്ലല്ലോ…”

ഗംഗയും വിട്ടുകൊടുക്കക്കുവാൻ ഒരുക്കമായിരുന്നില്ല

“ദേ… മര്യാദക്ക് സംസാരിക്കണം… പാവമല്ലേ എന്ന് കരുതി ഒരു സഹായം ചെയ്തപ്പോൾ തലയിൽ കയറുന്നോ…”

“ഞാൻ ആരുടേയും തലയിൽ കയറിയില്ല… കാര്യം പറഞ്ഞതാണ്..”

“നീ എന്ത് കാര്യം പറഞ്ഞെന്ന്…”

“ദേ എടി പോടീ എന്നൊക്കെ വിളിച്ചാൽ ഉണ്ടല്ലോ…”

ദേവൻ എന്തോ പറയാൻ വന്നതും രാജൻ അവർക്കിടയിൽ കയറി,