? അരികത്തായാരോ – 5 ? വിച്ചു [ ചെകുത്താനെ സ്നേഹിച്ച മാലാഖ ] 1158

” ഞാനായിട്ട് ഒരു ശല്യത്തിനും പോകില്ല എന്ന് ഞാൻ അവൾക്ക് വാക്ക് കൊടുത്തതാ …. എന്റെ സാമിപ്യം പോലും അവൾക്ക് ശല്യമായിട്ടായിരിക്കും തോന്നുന്നത് അതു കൊണ്ട് തന്നെയാ ഞാൻ ഒഴിഞ്ഞ് മാറി നടന്നത് …. പിന്നെ അവർ ആദ്യമായിട്ട് ഇവിടേയ്ക്ക് വന്നതു കൊണ്ട് ഞാൻ അകത്തേയ്ക്ക് ക്ഷണിച്ചു എന്നേ ഉള്ളൂ , അവർ വരുമെന്ന് ഞാനൊട്ടും പ്രതീക്ഷിച്ചില്ല . ”

അജു യദുവിനോട് പറഞ്ഞു ….

” മ് ….. നീ എല്ലാം പറഞ്ഞതു കൊണ്ട് ഞാനുമെല്ലാം തുറന്ന് പറഞ്ഞു …. നിന്നെപ്പറ്റി അറിഞ്ഞതിന് ശേഷം അന്ന് ഡ്രോയിംഗ് ബുക്ക് വലിച്ച് കീറിയത് തെറ്റായിപ്പോയെന്ന് അഹാനയ്ക്ക് തോന്നി തുടങ്ങിയിട്ടുണ്ട് …. ”

” ഹ് ……. സഹതാപം . ആരോരുമില്ലാത്തവനോട് തോന്നിയ സിമ്പതി …. എന്തിന് ….? എനിക്കതിന്റെ ആവശ്യമില്ല , ആ കണ്ണിൽ കൂടി എന്നെ കാണുന്നവരേയും ”

ഒരു പരിഹാസം കലർന്ന ചിരിയോടെ അജു മറുപടി പറഞ്ഞു ….

                           …………………………

ഓണാഘോഷങ്ങളും അവധി ദിവസങ്ങളും വേഗം തന്നെ കടന്ന് പോയി …..
അവധി കഴിഞ്ഞ് ക്ലാസ്സ് തുടങ്ങുന്നതിന് ഒരു ദിവസം മുൻപ് തന്നെ യദുവും അജുവും താമസസ്ഥലത്തേക്ക് മടങ്ങി എത്തി .

വെക്കേഷൻ കഴിഞ്ഞ് കോളേജ് തുറക്കുന്ന ആ ദിവസം ……. അൽപ്പം വൈകിയാണ് അജുവും യദുവും കോളേജിൽ എത്തിയത് , ക്ലാസ്സ് തുടങ്ങി കുറച്ച് സമയം കഴിഞ്ഞിരുന്നു ….