? അരികത്തായാരോ – 5 ? വിച്ചു [ ചെകുത്താനെ സ്നേഹിച്ച മാലാഖ ] 1158

പക്ഷെ പിന്നീട് ആ ദിവസം , നിന്നെ ഒന്ന് ആശ്വസിപ്പിക്കാൻ പോലും കൂടെ നിൽക്കാതെ അവൻ ബ്രേക്കപ്പും പറഞ്ഞ് പേയില്ലേ , നീ എത്ര പ്രാവശ്യം അവന്റെ കാല് പിടിക്കുന്ന രീതിയിൽ അവനോട് സംസാരിച്ചു പുറകെ നടന്ന് അപേക്ഷിച്ചു പക്ഷെ അവൻ തന്ന മറുപടി നിനക്ക് കൂടുതൽ വേദനയല്ലേ സമ്മാനിച്ചത് …..

അവന് നിന്നോടുണ്ടായിരുന്നത് യഥാർത്ഥ സ്നേഹമായിരുന്നെങ്കിൽ അവന്റെ സ്നേഹത്തിൽ ആത്മാർത്ഥത ഉണ്ടായിരുന്നെങ്കിൽ കൂടെ നിൽക്കില്ലായിരുന്നോ ഏത് ആപത്തിലും . അവനെ മറക്കാൻ കഴിയാത്തതല്ല നിന്റെ പ്രശ്നം , നിന്നോട് ഇഷ്ടമാണെന്ന് പറഞ്ഞ് വരുന്ന എല്ലാരും അവനെപ്പോലെയാണെന്നുള്ള നിന്റെ ഉള്ളിലെ തോന്നൽ അതാണ് പ്രശ്നം … എല്ലാം മറന്ന് കളയെടീ , എന്നിട്ട് പഴയ അഹാനയാവാൻ ശ്രമിക്ക് ….. ”

ദേവിക പറഞ്ഞതും അഹാന അവളെ നോക്കി ….

” എന്തിന് ? ഇനി ആർക്ക് വേണ്ടി ? അതും കൂടി നീ പറഞ്ഞ് താ….. പലതും അറിയുമ്പോൾ എല്ലാവരും പ്രണവായി മാറും , അവൻ ചെയ്തത് തന്നെ ചെയ്യും … ”

അഹാന അത് പറഞ്ഞതും ദേവിക തിരികെ ഒന്നും പറയാനാകാതെ മൗനമായി ഇരുന്നു …. അവൾ കാറ് സ്റ്റാർട്ട് ചെയ്ത് മുന്നോട്ട് നീങ്ങി …….

……….

അന്ന് വൈകുന്നേരം സ്നേഹദീപത്തിൽ .

” എടാ നീ എന്തിനാ ഒഴിഞ്ഞ് മാറി നടന്നത് ….? അവളോട് സംസാരിക്കാനുള്ള നല്ല ചാൻസായിരുന്നു അത് പോയി ….. ”

യദു അജുവിനോട് പറഞ്ഞു ….