💘 അരികത്തായാരോ – 10 💘 വിച്ചു [ ചെകുത്താനെ സ്നേഹിച്ച മാലാഖ ] 1132

” ഞാൻ നല്ലപോലെ ആലോചിച്ച ശേഷമാ ഈ പറയുന്നേ …. ഇനി എന്തെങ്കിലും പറ്റിയാൽ അവന്മാരോട് അതങ്ങ് ഏറ്റെടുക്കാൻ പറഞ്ഞാൽ മതി , കാശ് കൂടുതൽ കൊടുത്താൽ പോരെ . അവന്മാരാകുമ്പൊ വിശ്വസിച്ച് ഏൽപ്പിക്കാം തല പോയാലും നമ്മുടെ പേര് പുറത്ത് പറയില്ല …. ”

” ഹമ് ….. നിനക്ക് നിർബന്ധമാണേൽ ഞാൻ ചെന്ന് പറയാം …. ”

വിപിൻ അവനോട് പറഞ്ഞു .

” ആ പിന്നെ …. അവളും അവനും ഒരുമിച്ചുള്ളപ്പോൾ പണിതാൽ മതി , പുറത്തെവിടെയെങ്കിലും വച്ച് . അവന് രണ്ടെണ്ണം കിട്ടുന്നത് അവള് കാണണം , എന്റെ കരണത്ത് തല്ലിയവളാ , അത് ഞാൻ മറക്കില്ല ഒരിക്കലും …. അവന്മാരോട് അവിടെ വച്ച് മനപൂർവ്വം എന്തെങ്കിലും ഒരു ഇഷ്യു ഉണ്ടാക്കിയ ശേഷം കൈകാര്യം ചെയ്യാൻ പറ , അതാവുമ്പോ ആരും നമ്മളെ സംശയിക്കില്ല …. ”

നിവേദ് അവനോട് പറഞ്ഞു ….

” ശരിയെടാ , എന്നാ ഞാൻ ഇറങ്ങുവാ . ഇപ്പൊ പോയാൽ അവന്മാര് അവിടെ കാണും . ബാക്കി അവര് നോക്കിക്കോളും …. ”

വിപിനതും പറഞ്ഞ് തിരികെ പോയി …. നിവേദ് സന്തോഷവും ദേഷ്യവും കലർന്ന ഭാവത്തോടെ അങ്ങനെ കിടന്നു .

                           …………………………

കോളേജിൽ ……

അഹാന ഇടയ്ക്കിടയ്ക്ക് അജു ഇരിക്കുന്ന സീറ്റിലേയ്ക്ക് തിരിഞ്ഞ് നോക്കുന്നുണ്ടെങ്കിലും അവനതൊന്നും ശ്രദ്ധിക്കാതെ സങ്കട ഭാവത്തിൽ എന്തോ ആലോചിച്ച് ഇരിക്കുകയാണ് , ഇപ്പോഴും ഇന്നലെ കേട്ടറിഞ്ഞ കാര്യങ്ങളിൽ നിന്ന് അവൻ റിക്കവറായിട്ടില്ല എന്നവൾക്ക് മനസ്സിലായി ……