💘 അരികത്തായാരോ – 10 💘 വിച്ചു [ ചെകുത്താനെ സ്നേഹിച്ച മാലാഖ ] 1132

ആ പടികൾ കയറി ഒടുവിൽ അവർ ചെന്നെത്തിയത് കുന്നിൻ മുകളിലുള്ള ഒരു ചെറിയ ക്ഷേത്രത്തിന് മുന്നിലാണ് …. ആ ക്ഷേത്രത്തിന് മുന്നിലായി പടർന്ന് പന്തലിച്ച് നിൽക്കുന്ന വലിയ ഒരു ആൽമരം അവിടെയാകെ തണലും ഒപ്പം കുളിർമയും പകരുന്നു , അതോടൊപ്പം ആ പ്രദേശം മുഴുവൻ നിരീക്ഷിച്ചു കൊണ്ട് കൃഷ്ണപ്പരുന്തുകൾ ശബ്ദമുണ്ടാക്കി വട്ടമിട്ട് പറന്നു കൊണ്ടിരിക്കുന്നു …. ആ ക്ഷേത്രത്തിന് മുന്നിലെത്തിയതും അജു തിരിഞ്ഞ് അവളെ ഒന്ന് നോക്കി ….

” അമ്മ ഉണ്ടായിരുന്ന സമയത്ത് മിക്ക ദിവസവും ഞാനും അമ്മയും ഇവിടെ വന്ന് പ്രാർത്ഥിക്കുമായിരുന്നു …. മനസ്സിൽ എന്ത് സങ്കടമുണ്ടെങ്കിലും കണ്ണനോട് പറഞ്ഞാൽ മതി എല്ലാം കണ്ണൻ നോക്കിക്കോളുമെന്ന് അമ്മ എപ്പോഴും പറയും , അമ്മ ഒരു കൃഷ്ണ ഭക്തയായിരുന്നു …. അമ്മ മരിച്ചതിൽ പിന്നെ ഞാനിപ്പോഴാ ഇവിടെ വരുന്നേ …. അജു കണ്ണനോട് പ്രാർത്ഥിക്ക് , കണ്ണൻ മനസ്സിലെ എല്ലാ സങ്കടങ്ങളും മാറ്റിത്തരും … ആദ്യം ഒരുപാട് പരീക്ഷിക്കും എന്നാലും അവസാനം സന്തോഷം മാത്രമേ തരൂ , ഒരുപാട് സങ്കടം തന്നിട്ട് ഇപ്പൊ എന്റെ മനസ്സിലെ സങ്കടങ്ങൾ മാറ്റി സന്തോഷം തന്നത് പോലെ … ”

ഒരു പുഞ്ചിരിയോടെ അഹാന അജുവിന്റെ മുഖത്ത് നോക്കി പറഞ്ഞ ശേഷം ക്ഷേത്രത്തിനുള്ളിലെ ശ്രീകൃഷ്ണ വിഗ്രഹത്തെ നോക്കി കണ്ണുകളടച്ച് കൈകൂപ്പി …..
കണ്ണുകളടച്ച് പ്രാർത്ഥനയിൽ മുഴുകി നിൽക്കുന്ന അഹാനയെ ഒരു നിമിഷം അജു ചെറു പുഞ്ചിരിയോടെ നോക്കി നിന്നു പോയി .