💘 അരികത്തായാരോ – 10 💘 വിച്ചു [ ചെകുത്താനെ സ്നേഹിച്ച മാലാഖ ] 1132

‘ എന്തിനാ കണ്ണാ ഈ പരീക്ഷണം . അവൾ എത്ര തവണ ഈ നടയിൽ വന്ന് നിന്നോട് പ്രാർത്ഥിച്ചിട്ടുള്ളതാ എന്നിട്ടും അവളുടെ എല്ലാമെല്ലാമായ അമ്മയെ നീ നേരത്തേ തിരികെ വിളിച്ചു , ഒപ്പം അവൾക്ക് ശരീരത്തിനും മനസ്സിനും വേദന മാത്രം സമ്മാനിക്കുന്ന ഒരു രോഗവും നീ നൽകി …. എന്തിനാ ആ പാവത്തിനോട് ഇത്ര ക്രൂരത …. ഇന്നും നിന്റെ മുന്നിൽ വന്ന് കൈകൂപ്പിയതല്ലേ അവൾ , എന്നിട്ട് ഇപ്പൊ മരണവും കാത്ത് കിടക്കുന്ന ഗതിയിലായില്ലേ ….. ‘

അവൻ മുന്നിലെ വിഗ്രഹത്തെ നോക്കി കൈകൂപ്പി പറഞ്ഞ ശേഷം പൊട്ടിക്കരഞ്ഞു …. അപ്പോഴേയ്ക്കും പൂജാരി അവന്റെ മുന്നിലേയ്ക്ക് വന്നു ….

” എന്താ …. എന്താ പ്രശ്നം ? ”

അയാൾ ചോദിച്ചതും നിറഞ്ഞ കണ്ണുകൾ മാത്രമായിരുന്നു അവന്റെ മറുപടി ….

” മ് ….. മനസ്സിലായി …… പ്രാണൻ തരുന്നതും തിരികെ എടുക്കുന്നതും ഈശ്വരനാ ….. നീ ഇവിടെ വന്നത് ആരുടെയോ പ്രാണന് ഒരാപത്തും വരരുതേ എന്ന് പ്രാർത്ഥിക്കാനാണെന്ന് നിന്നെ കണ്ടപ്പോൾ തന്നെ എനിക്ക് തോന്നി …. ദൈര്യമായിരിക്ക് , നിന്റെ കണ്ണുനീർ കാണാതിരിക്കാൻ ഈശ്വരനാകില്ല ….. ”

അയാൾ അത്രയും പറഞ്ഞ് പൂജാകർമ്മങ്ങൾക്കായി ക്ഷേത്രത്തിനുള്ളിലേയ്ക്ക് കയറി . ഉടനെ അവന്റെ ഫോൺ മുഴങ്ങി , ഓർഫനേജിൽ നിന്ന് ബെനഡിക് ഫാദർ ആയിരുന്നു അത് ….