💘 അരികത്തായാരോ – 10 💘 വിച്ചു [ ചെകുത്താനെ സ്നേഹിച്ച മാലാഖ ] 1132

ഹോസ്പിറ്റലിന് മുന്നിൽ കാറ് നിർത്തി സ്ട്രെച്ചറിന് പോലും കാത്ത് നിൽക്കാതെ അവളെയും കയ്യിൽ കോരിയെടുത്ത് അവൻ ഉള്ളിലേയ്ക്ക് ഓടി ….. വേഗം തന്നെ ഡോക്ടർമാരും നഴ്സുമാരും ഓടിക്കൂടി , പെട്ടെന്ന് തന്നെ അവളെ അവർ ICU വിലേയ്ക്ക് ഷിഫ്റ്റ് ചെയ്തു .

ഹോസ്പിറ്റലുകാർ തന്നെ വേഗം മഹേന്ദ്രനാഥിനെ വിവരമറിയിച്ചു , ആ സമയം തന്നെ അഹാനയുടെ വീടിന് മുന്നിൽ യദുവും ദേവുവും എത്തിയിരുന്നു , അജുവിന്റെ ബുള്ളറ്റിൽ . ഭയത്തോടെ വേഗത്തിൽ പുറത്തേയ്ക്ക് വരുന്ന മഹേന്ദ്രനാഥിനെ കണ്ട് ദേവു കാര്യം തിരക്കി , അഹാനയ്ക്ക് ഒരു ആക്സിഡന്റ് പറ്റി ഹോസ്പിറ്റൽ ആണെന്ന് മാത്രം അയാൾ പറഞ്ഞു , അവരും പരിഭ്രാന്തിയിലായി . മഹേന്ദ്രനാഥിനൊപ്പം അവരും കാറിൽ കയറി വേഗം അവിടുന്ന് ഹോസ്പിറ്റലിലേയ്ക്ക് പുറപ്പെട്ടു …..

അവളുടെ രക്തം പുരണ്ട തന്റെ ഇരു കൈകളിലേയ്ക്കും മാറി മാറി നോക്കിക്കൊണ്ട്
I C U വിന് പുറത്ത് നിരത്തിയിട്ടിരിക്കുന്ന കസേരകളിൽ ഒന്നിൽ തളർന്ന് ഇരിക്കുകയാണ് അജു , ഒപ്പം അവന്റെ കണ്ണുകൾ നിറഞ്ഞൊഴുകുന്നുണ്ടായിരുന്നു . ഡോക്ടർമാർ വേഗത്തിൽ I C U വിനുള്ളിലേയ്ക്ക് കയറി പോകുന്നത് കണ്ട് അവന്റെ ഉള്ളൊന്ന് പിടഞ്ഞു , പക്ഷെ ആരും അവനോട് ഒന്നും പറയുന്നില്ല ….

മിനിട്ടുകൾ കൊണ്ട് മഹേന്ദ്രനാഥ് ഹോസ്പിറ്റൽ എത്തിച്ചേർന്നു ഒപ്പം യദുവും ദേവുവും …. അവർ വേഗത്തിൽ ICU വിനടുത്തേയ്ക്ക് ഓടി ……