✮കൽക്കി࿐ (ഭാഗം – 29) അദ്ധ്യായം 2 – അവസാന ഭാഗം , വിച്ചു [ചെകുത്താനെ സ്നേഹിച്ച മാലാഖ ] 841

ഉടനെ തന്നെ കൊട്ടാരത്തിലെ ഇപ്പോഴത്തെ തമ്പുരാനായ രവി വർമ്മൻ തൻ്റെ ഇരിപ്പിടത്തിൽ നിന്ന് എഴുന്നേറ്റു ,

” അവർ ഇരുവർക്കും സമ്മതമാണെങ്കിൽ പിന്നെ എന്ത് തടസ്സം .. മത്സരക്കളത്തിൽ മത്സരാർത്ഥി മരിച്ച് വീഴുന്നത് ആദ്യമല്ലല്ലോ ….. ചക്രവ്യൂഹം അത് തന്നെയാകട്ടെ ഇത്തവണത്തെ അവസാന മത്സരം ….. ”

അയാൾ ഉറക്കെ വിളിച്ചു പറഞ്ഞതും നാല് പാടും നിന്ന് ആരവവും ആർപ്പ് വിളിയും ഉയർന്നു …

” ഇനി ഒരു കാരണവശാലും നിങ്ങൾക്ക് രണ്ട് പേർക്കും മത്സരത്തിൽ നിന്ന് പിന്മാറാൻ കഴിയില്ല , ഒരാളുടെ മരണം കൊണ്ടല്ലാതെ …. ”

മത്സരത്തിന് നേതൃത്വം കൊടുക്കുന്നയാൾ പറഞ്ഞ ശേഷം നീട്ടി വിസിൽ മുഴക്കി , മത്സരത്തിന് മുന്നോടിയായുള്ള ആദ്യ വിസിൽ …

കളിക്കളത്തിൽ നിന്നിരുന്നവർ കളിക്കളം വിട്ട് പുറത്തിറങ്ങി , അവിടെ ജഗന്നാഥും ആദിയും മാത്രം .

” അപ്പൊ നീയാണ് ചേകവർ മനയിലെ അവസാന ആൺതരി ….. എല്ലാത്തിനും കാരണക്കാരൻ . ”

ജഗന്നാഥ് ദേഷ്യത്തോടെ അവനോട് ചോദിച്ചു ….

” അവൾ എവിടെ ? ”

” ഹ …. ഹ ….. ഇവിടെ കൂടി നിൽക്കുന്നവർക്കും കയ്യടിക്കുന്നവർക്കും ഇത് വെറും മത്സരം മാത്രമാ ….. നീ എന്തിനാണ് മത്സരിക്കുന്നതെന്ന് പോലും ആർക്കുമറിയില്ല …. പക്ഷെ നമുക്ക് അങ്ങനെയല്ല , ഞാൻ എൻ്റെ പ്രതികാരത്തിന് വേണ്ടിയും നീ അവൾക്ക് വേണ്ടിയും . എനിക്ക് നിന്നെ ഒത്തു കിട്ടണമായിരുന്നു ഇതുപോലത്തെ ഒരു തുറന്ന സ്ഥലത്ത് ഈ നാട്ടുകാരുടെ മുന്നിൽ . പിന്നെ പേടിക്കണ്ട നീ ചാകുന്നതിന് ഒരു നിമിഷം മുൻപെങ്കിലും ഞാൻ വിളിച്ച് പറയും നീ ചേകവർ മനയിലെ സന്തതിയാണെന്ന് , അപ്പൊ നിനക്ക് മനസ്സിലാകും ഈ നാടിൻ്റെ രോഷം .