✮കൽക്കി࿐ (ഭാഗം – 29) അദ്ധ്യായം 2 – അവസാന ഭാഗം , വിച്ചു [ചെകുത്താനെ സ്നേഹിച്ച മാലാഖ ] 842

വേഗത്തിൽ മുന്നോട്ട് പാഞ്ഞ കർണൻ ആദിയെ മറികടന്ന് കുതിച്ച് ചാടി അതേ സമയം അഴിഞ്ഞ് നിലത്ത് കൂടി ഇഴഞ്ഞ ആ കടിഞ്ഞാൺ ബോധമറ്റ് കിടക്കുന്ന ആദിയുടെ കയ്യുടെ അടുത്തെത്തി ,

ഇതേ സമയം ആദിയുടെ കൈ പെട്ടെന്ന് ആ കടിഞ്ഞാണിൽ പിടിത്തമിട്ടു …

കളിക്കളത്തിന് ചുറ്റും നിന്ന ഏവരും മിഴി ചിമ്മാതെ നോക്കി നിന്ന നിമിഷം .
കടിഞ്ഞാണിൽ പിടി മുറുക്കിയ ആദി ഉയർന്ന് പൊങ്ങി കറങ്ങിത്തിരിഞ്ഞ് കർണൻ്റെ പുറത്തേയ്ക്ക് ചാടിക്കയറി അവന്റെ വേഗതയ്ക്കൊപ്പം . ആ സമയം ആദിയുടെ ഭാവവും നോട്ടവും ആകെ മാറിയിരുന്നു , കണ്ണുകളിൽ പടർന്ന് കയറിയ രക്തവർണ്ണവും കൈകളിൽ വലിഞ്ഞ് മുറുകിയ ഞരമ്പുകളും അവനെ തീർത്തും മറ്റാരെയോ പോലെ ആക്കിയിരുന്നു .

ആ കാഴ്ച ഏവരും ഒരൽഭുതം പോലെ നോക്കി നിന്നു … നാല് പാടും നിന്ന് ആർപ്പ് വിളിയും കരഘോഷവും ഉച്ചത്തിലായി . നന്ദാവനം മനയിലുള്ളവർ അപ്പോഴും ഒരു തരം ഞെട്ടലിലാണ് . ദക്ഷയുടെ കണ്ണുകൾ നിറഞ്ഞൊഴുകി .

കളിക്കളത്തിൻ്റെ ഒരറ്റത്ത് ജഗന്നാഥ് അപ്പോഴും സംശയഭാവത്തോടെ കുതിരപ്പുറത്തിരിക്കുകയാണ് , ഇങ്ങറ്റത്തായി കർണ്ണൻ്റെ പുറത്ത് ആദിയും .

മുന്നിൽ നടക്കുന്നതൊക്കെ കണ്ട് ജഗന്നാഥിൻ്റെ പകയും ദേഷ്യവും വർദ്ധിച്ചു കൊണ്ടേയിരുന്നു . കടിഞ്ഞാണിലെ അവൻ്റെ പിടിത്തം മുറുകി ഞെരിഞ്ഞു . കയ്യിലെ ചൂരൽ വടി മുറുക്കെ പിടിച്ചു കൊണ്ട് അവൻ തൻ്റെ വലത് കാൽ കൊണ്ട് കുതിരയെ ഒന്ന് തട്ടിയ ശേഷം കടിഞ്ഞാൺ പുറകിലേക്ക് വലിച്ചു . അതേ സമയം അവൻ്റെ കുതിര മുന്നോട്ട് കുതിച്ചു …