✮കൽക്കി࿐ (ഭാഗം – 20 ) വിച്ചു [ചെകുത്താനെ സ്നേഹിച്ച മാലാഖ ] 894

ആ കാട്ടുപോത്തിന്റെ വേഗത ഓരോ നിമിഷവും കൂടിക്കൊണ്ടിരുന്നു … ഇത് തന്നെയാണ് അവസരം എന്ന് മനസ്സിലാക്കി അതിന്റെ പുറത്ത് കിടന്ന നരസിംഹൻ തന്റെ വലത് കൈ വേഗത്തിൽ മുന്നോട്ട് ചലിപ്പിച്ച് രണ്ട് വിരലുകൾ കൊണ്ട് അവൻ അതിന്റെ മൂക്കിന് ഇരുവശങ്ങളിലുമായി പിടിത്തമിട്ടു …

ആ നിമിഷം തന്നെ വേദന കൊണ്ട് ആ കാട്ട് പോത്ത് തന്റെ തല നല്ല രീതിയിൽ മുന്നിലേയ്ക്ക് കുനിച്ചു …. അത് തന്റെ തല മുന്നിലേയ്ക്ക് വളരെ താഴ്ത്തി കുനിച്ചതും അതിന്റെ കൊമ്പ് നിലത്ത് കുത്തിയതും ഒരുമിച്ചായിരുന്നു ….. വേഗതയ്ക്ക് മുന്നിൽ പിടിച്ച് നിൽക്കാൻ കഴിയാതെ ആ കാട്ടുപോത്ത് നിലത്ത് തല കുത്തി മലർന്നടിച്ച് വീണു , ഇതേ സമയം തന്നെ നരസിംഹൻ അതിന്റെ പുറത്ത് നിന്ന് എടുത്ത് ചാടുകയും ചെയ്തു ….

നിലത്ത് തല കുത്തി മറിഞ്ഞുരുണ്ട ശേഷം നരസിംഹൻ എണീറ്റു … ചുറ്റിലും നിന്ന് ആരവും കയ്യടിയും ശക്തമായി കേൾക്കാൻ തുടങ്ങി . ചുറ്റിലും നിൽക്കുന്നവർ വിജയിയായി നിൽക്കുന്ന തന്നെ നോക്കി ആർപ്പ് വിളി മുഴുക്കുന്നത് കേട്ട അവനൊന്ന് തല ഉയർത്തി നോക്കിയ ശേഷം പുറകിലേയ്ക്ക് തിരിഞ്ഞ് നോക്കി …

നിലത്ത് മലർന്നടിച്ച് വീണ് ഒന്നെഴുന്നേൽക്കാൻ പോലും കഴിയാതെ ഒരു വശത്തെ കൊമ്പുമൊടിഞ്ഞ് കിടക്കുന്ന ആ കാട്ടുപോത്തിനെ കണ്ടതും അവൻ വേഗം മുന്നോട്ട് നീങ്ങി ശേഷം അതിന്റെ അടുത്ത് മുട്ട് മടക്കിയിരുന്നു …..

” നീയല്ല തെറ്റുകാരൻ , കാട്ടിൽ സ്വസ്ഥമായി കഴിഞ്ഞ നിന്നെ ഇവിടെ എത്തിച്ചില്ലേ ചിലർ അവരാ തെറ്റ് ചെയ്തത് … നിന്നെ വീഴ്ത്തുകയല്ലാതെ മറ്റ് വഴികളില്ലായിരുന്നു എന്റെ മുന്നിൽ …. ”