✮കൽക്കി࿐ (ഭാഗം – 11 {അധ്യായം – 2 ആരംഭം} ) വിച്ചു [ചെകുത്താനെ സ്നേഹിച്ച മാലാഖ ] 859

അവിടുന്ന് ചാടിയ ആ യുവാവ് വന്ന് വീണത് ഉയരമുള്ള ആ മതിലിന് അപ്പുറത്തായി വളർന്ന് കിടക്കുന്ന പുല്ലിന് പുറത്തായിട്ടായിരുന്നു . വേഗത്തിൽ നിലത്ത് നിന്നെണീറ്റ അവൻ തൊട്ടടുത്തായി ഇരിക്കുന്ന വില കൂടിയ തന്റെ ആ സ്പോഴ്സ് ബൈക്കിലേയ്ക്ക് കയറി . ഞൊടിയിടയിൽ ഹെൽമറ്റെടുത്ത് തലയിൽ വച്ച് ലോക്ക് ചെയ്ത ശേഷം ബൈക്ക് സ്റ്റാർട്ട് ചെയ്ത ആ മൺപാതയിലൂടെ മുന്നോട്ട് കുതിച്ചു ഒരു കാതടയ്പ്പിക്കുന്ന ശബ്ദത്തോടെ …

അത് കണ്ടതും വന്നതിൽ ചില ജീപ്പുകൾ വേഗത്തിൽ റിവേഴ്സ് തിരിഞ്ഞ് മുന്നോട്ട് കുതിച്ചു , അവനെ പിടിക്കാനായി . ചില പോലീസുകാർ വേഗം ആ മ്യൂസിയത്തിനകത്തേയ്ക്ക് ഓടിക്കയറി .

അകത്തേയ്ക്ക് ഓടിക്കയറിയ പോലീസുകാർ ഒരു നിമിഷത്തേയ്ക്ക് അകത്തെ കാഴ്ച കണ്ട് ഞെട്ടിത്തരിച്ച് നിന്നു പോയി . വേഗം തന്നെ അവർ നിലത്ത് വീണ് കിടക്കുന്ന ഓരോ സെക്യൂരിട്ടിക്കാരെയും അടുത്തേയ്ക്ക് നീങ്ങി പരിശോധിക്കാൻ തുടങ്ങി ….
ചുറ്റും നിന്നവർ അപ്പോഴും ഒരു പതർച്ചയോടെ പേടിച്ച് നിൽക്കുകയാണ് , തൊട്ട് മുൻപ് നടന്ന സംഭവങ്ങൾ വിശ്വസിക്കാനാകാതെ .

നിശബ്ദമായിരുന്ന ആ സ്ഥലത്ത് അപ്പോഴേക്കും ഒരു ബൂട്ടിന്റെ ശബ്ദം പ്രതിധ്വനിച്ചു , ആ ശബ്ദം പ്രധാന കവാടത്തിനടുത്ത് നിന്ന് അകത്തേക്ക് അടുത്തു കൊണ്ടിരുന്നു … വെട്ടി മിനുക്കിയ മീശയും ക്ലീൻ ഷേവ് ചെയ്ത താടിയും ആരോഗ്യമുള്ള ശരീരവുമൊക്കെയായി പോലീസ് യൂണിഫോമിൽ ഒരു യുവാവ് , C I റാങ്കിലുള്ള ഒരു പോലീസ് ഉദ്ദ്യോഗസ്ഥൻ .

ചുറ്റിലും കണ്ണോടിച്ചു കൊണ്ട് അയാൾ അകത്തേക്ക് കയറി വന്നു . അയാളെ കണ്ടതും ഒരു പോലീസുകാരൻ വേഗം മുന്നോട്ട് വന്ന് സല്യൂട്ട് നൽകി ….