✮കൽക്കി࿐ (ഭാഗം – 11 {അധ്യായം – 2 ആരംഭം} ) വിച്ചു [ചെകുത്താനെ സ്നേഹിച്ച മാലാഖ ] 859

ആ പേരും പിന്നെ ഈ കാര്യങ്ങളും മോള് മനസ്സിൽ തന്നെ വച്ചാൽ മതി , ഒന്നും ആരോടും ചോദിക്കരുത് കാരണം മോളോട് അച്ഛൻ ഇപ്പൊ പറഞ്ഞ കാര്യം എനിക്കും മോൾക്കുമല്ലാതെ മറ്റാർക്കും അറിയില്ല , മോളുടെ അമ്മാവന്മാർക്ക് പോലും . കാരണം മോളറിയാത്ത ഒരു വലിയ കഥയുണ്ട് , സമയമാവുമ്പോൾ അച്ഛൻ മോൾക്കത് പറഞ്ഞ് തരാം . ”

അയാളതും പറഞ്ഞ് അവിടുന്ന് എണീറ്റ് പതിയെ തിരികെ നടന്നു …….

ദക്ഷയ്ക്ക് പലതും മനസ്സിലായിരുന്നില്ല , ഒപ്പം ഒരു പാട് സംശയങ്ങളും .
‘ തന്റെ അമ്മയെ എന്തിന് കൊല്ലണം , അതും ആര് ? . അമ്മയെയും എന്നെയും രക്ഷിക്കാൻ ശ്രമിച്ചയാളെയും പിന്നെ ആരും കണ്ടില്ലെന്ന് അയാൾക്കെന്ത് സംഭവിച്ചു . അയാളെക്കുറിച്ച് ആരോടും ഒന്നും ചോദിക്കരുതെന്ന് , ആ പേരു പോലും പറയരുതെന്ന് , എന്തുകൊണ്ട് ? ‘ അങ്ങനെ ഉത്തരം കിട്ടാത്ത ഒരുപാട് ചോദ്യങ്ങൾ .

                    ……………………..

അന്ന് വൈകിട്ടോടെ …….
നന്ദാവനം മന ,

എങ്ങും ചെറുതായി ഇരുട്ട് പരന്ന് തുടങ്ങിയിരുന്നു
ആ തറവാടിനുള്ളിലെ നടുമുറ്റത്ത് എല്ലാവരും ഒത്ത് കൂടിയിരിക്കുകയാണ് ഓരോരോ വിശേഷങ്ങൾ പറഞ്ഞു കൊണ്ട് ഒപ്പം സംഗീതം കൊണ്ടും നൃത്തം കൊണ്ടും ഓരോരുത്തരും അവരുടേതായ രീതിയിൽ ആ കൂടിച്ചേരൽ ഇമ്പമാക്കാൻ ശ്രമിക്കുന്നുമുണ്ട് …..

മ്യൂസിക് സിസ്റ്റത്തിൽ നിന്ന് വരുന്ന ഒരു പഴയ തമിഴ് ഗാനത്തിനൊപ്പം അനാമിക ചുവടുകൾ വയ്ക്കുകയായിരുന്നു . എല്ലാവരും അവളുടെ ആ മനോഹരമായ നൃത്തച്ചുവടുകളിൽ തന്നെ നോക്കിയിരുന്നു …. ഒടുവിൽ അവളുടെ നൃത്തം അവസാനിച്ചതും എല്ലാവരെയും കരഘോഷങ്ങൾ അവിടെ മുഴങ്ങി .