✮കൽക്കി࿐ (ഭാഗം – 11 {അധ്യായം – 2 ആരംഭം} ) വിച്ചു [ചെകുത്താനെ സ്നേഹിച്ച മാലാഖ ] 859

” സർ , ആരും തന്നെ ജീവനോടെയില്ല ….. ”

അയാളത് പറഞ്ഞതും ആ യുവാവ് വേഗം തന്റെ തൊപ്പി തലയിൽ നിന്ന് ഊരി മാറ്റി , ശേഷം ഒന്ന് ചുറ്റും നോക്കി . പേടിച്ച് പരിഭ്രാന്തിയോടെ നിൽക്കുന്ന ആൾക്കാരെയാണ് അയാൾ കണ്ടത് അതും പല പ്രായത്തിൽ ഉള്ളവർ …..

“പ്ലീസ് കോ ഓപ്പറേറ്റ് , ആരും ഭയക്കേണ്ടതില്ല …… നിങ്ങളെ ഇപ്പോൾ പുറത്ത് വിടാൻ നിർവ്വാഹമില്ല , തൽക്കാലം നിങ്ങൾ ക്ഷമയോടിരിക്കണം , ചില കാര്യങ്ങൾ ചോദിച്ചറിഞ്ഞ് ഇവിടുത്തെ പ്രൊസീജേഴ്സ് കഴിഞ്ഞ ശേഷം നിങ്ങൾക്ക് പോകാം പ്ലീസ് ….. ”

ആ CI അവരോട് പറഞ്ഞ ശേഷം മറ്റുള്ള പോലീസുകാർക്ക് നിർദ്ദേശം നൽകി , ഉടനെ തന്നെ ആൾക്കാരെ മുഴുവൻ തൊട്ടടുത്ത ഒരു വലിയ റെസ്റ്റിങ് ഏരിയയിലേക്ക് മാറ്റി ….

” സർ എല്ലാ സ്റ്റേഷനിലേക്കും വയർലസ് ഇൻഫർമേഷൻ പാസ് ചെയ്തിട്ടുണ്ട് , കൂടാതെ എമർജൻസി ചെക്കിങ്ങും ആരംഭിച്ചിട്ടുണ്ട് . അവൻ ഈ സിറ്റി വിട്ട് പുറത്തേയ്ക്ക് പോകില്ല . കൂടുതൽ ഫോഴ്സ് വേണ്ടി വരും സർ , മീഡിയ അറിഞ്ഞ് കഴിഞ്ഞാൽ നമ്മളെ കൊണ്ട് പറ്റില്ല … ”

ഒരു പോലീസുകാരൻ അപ്പോഴേക്കും ആ C I യുടെ അടുത്ത് വന്നു പറഞ്ഞു .

” ഓക്കെ , ഡു ഇറ്റ് അൻവർ . ക്രൈം പ്രൊസീജർ പെട്ടെന്ന് ഫിനിഷ് ചെയ്തത് ബോഡി ഷിഫ്റ്റ് ചെയ്യാനുള്ള കാര്യങ്ങൾ ചെയ്യണം . ”

അത്രയും പറഞ്ഞ ശേഷം അയാൾ മുന്നോട്ട് നടന്നു …..

” ഇവിടുന്ന് എന്താ മോഷണം പോയത് . ചെക്ക് ചെയ്തോ ….. ? ”

അയാൾ ആ മ്യൂസിയത്തിലെ ഹെഡ് ആയ ഒരു ജീവനക്കാരനോട് ചോദിച്ചു ….

” ഇ ….. ഇല്ല സർ …. ആ ഷോക്കിൽ ഞങ്ങൾ പേടിച്ച് പോയി ….. ഇപ്പൊ ചെക്ക് ചെയ്ത് പറയാം സർ ….. ”