✮കൽക്കി࿐ (ഭാഗം – 11 {അധ്യായം – 2 ആരംഭം} ) വിച്ചു [ചെകുത്താനെ സ്നേഹിച്ച മാലാഖ ] 859

ഉടനെ ,

തോക്ക് ചൂണ്ടി നിന്ന ഒരു സെക്യൂരിറ്റിക്കാരൻ കണ്ണുകൾ കൊണ്ട് തന്റെ വലത് വശത്ത് നിന്ന മറ്റൊരു സെക്യൂരിട്ടിക്ക് നിർദ്ദേശം നൽകിയതും അയാൾ തന്റെ തോക്ക് ചൂണ്ടിക്കൊണ്ട് തന്നെ മുന്നോട്ട് വെടിയേറ്റ് കിടക്കുന്നയാളുടെ അടുത്തേയ്ക്ക് നീങ്ങി .

അവന്റെ അടുത്ത് എത്തിയ അയാൾ പതിയെ തന്റെ കാലുകൾ കൊണ്ട് അവന്റ ശരീരം ഒന്ന് തട്ടി നോക്കി , അനങ്ങാതെയുള്ള ആ കിടപ്പിൽ അവൻ മരിച്ചു കഴിഞ്ഞു എന്ന് തോന്നിയതും അയാൾ തന്റെ പിസ്റ്റൽ പുറകിൽ അരയിലായി തിരുകി വച്ച ശേഷം മുട്ടുകൾ മടക്കി നിലത്തിരുന്നിട്ട് അവന്റെ മൂക്കിൽ തന്റെ കൈ വച്ച് നോക്കി ശ്വാസം ബാക്കി ഉണ്ടോ എന്ന് ഉറപ്പിക്കാനായി …..

‘ ഇല്ല …. ശ്വാസം ഇല്ല , ഇവൻ മരിച്ച് കഴിഞ്ഞു . ‘

അയാൾ മനസ്സിൽ ചിന്തിച്ചു കൊണ്ട് എഴുന്നേൽക്കാൻ ശ്രമിച്ചപ്പോഴാണ് അയാളത് ശ്രദ്ധിച്ചത് , ഇവന് വെടിയേറ്റു ശരി തന്നെ പക്ഷെ ഒരു തുള്ളി രക്തം പോലും ഇവന്റെ ശരീരത്തിൽ നിന്ന് പുറത്ത് വന്നിട്ടില്ല . അയാൾ സംശയം തോന്നി അവന്റെ കൈ ഉയർത്തി കൈത്തണ്ടയിലെ പൾസ് നോക്കി ….

ഒരു ഞെട്ടലായിരുന്നു അയാളുടെ മുഖത്ത് അപ്പോൾ ഉണ്ടായത് ….. അയാളുടെ ഹൃദയം പെരുമ്പറ കണക്കെ പെട്ടെന്ന് മുഴങ്ങി , അല്ല സത്യത്തിൽ ഹൃദയം നിലച്ചത് പോലെ .

അയാൾ ആ ഞെട്ടലോടെ മുഖത്ത് മാസ്കുമായി കിടക്കുന്ന ആ യുവാവിന്റെ മുഖത്തേയ്ക്ക് ഒന്ന് നോക്കി . പെട്ടെന്ന് അവൻ കണ്ണുകൾ തുറന്നു . ഞൊടിയിടയിൽ അവൻ തന്റെ ഇടത് കയ്യിൽ പിടിച്ചിരിക്കുന്ന ആ സെക്യൂരിറ്റിക്കാരന്റെ കൈയ്യിൽ മാറിക്കയറി പിടിച്ച് വേഗത്തിൽ തന്റെ അടുത്തേക്ക് വലിച്ച ശേഷം തന്റെ വലത് കയ്യിലെ ചുണ്ട് വിരൽ കൂർപ്പിച്ച് ആ സെക്യൂരിറ്റിക്കാരന്റെ കഴുത്തിൽ താഴിത്തിയിറക്കി .