✮കൽക്കി࿐ (ഭാഗം – 11 {അധ്യായം – 2 ആരംഭം} ) വിച്ചു [ചെകുത്താനെ സ്നേഹിച്ച മാലാഖ ] 859

ആ വാക്കുകൾ മന്ത്രിക്കുമ്പോഴും അവളുടെ ചുണ്ടിൽ ഒരു പുഞ്ചിരി നിറഞ്ഞ ഭാവമായിരുന്നു , തന്റെ ലക്ഷ്യത്തിലേക്ക് താൻ അടുത്തു കൊണ്ടിരിക്കുകയാണെന്ന ആത്മവിശ്വാസത്തോടെ …….. അവൾ മുന്നോട്ട് നടന്ന് തന്റെ കൂട്ടുകാരികൾക്കൊപ്പം എത്തി , അവിടെ നിന്ന് പ്രധാന ഹാളിൽ എത്തിയ അവർ അടുത്ത സെക്ഷനിലേക്ക് പോകാനായി തിരിഞ്ഞതും ….

പെട്ടെന്ന് ,

ആ ബിൽഡിങ്ങിനുള്ളിലെ സെക്യൂരിറ്റി അലറാം അത്യുച്ചത്തിൽ മുഴങ്ങാൻ തുടങ്ങി , ഒപ്പം പല സ്ഥലത്തായി സ്ഥാപിച്ചിട്ടുള്ള ചുവന്ന ലൈറ്റുകളും മിന്നി മിന്നി പ്രകാശിച്ചു ….

ആ ശബ്ദം കേട്ടതും അവിടെ ആ മ്യൂസിയത്തിനുള്ളിൽ ഉണ്ടായിരുന്ന സന്ദർശകരും ജീവനക്കാരും ഒരു നിമിഷത്തേയ്ക്ക് ഞെട്ടിത്തരിച്ചു നിന്നു പോയി , എല്ലാവരും പരസ്പരം ചുറ്റും നോക്കി എന്താണ് കാര്യമെന്നറിയാതെ ….

ഞൊടിയിടയിൽ മ്യൂസിയത്തിലെ സെക്യൂരിറ്റി ജീവനക്കാർ ( armed security force ) പല സ്ഥലങ്ങളിലായി വിന്യസിച്ചു , അലാറം മുഴങ്ങിയ സമയം തന്നെ ഓട്ടോമാറ്റിക്കായി മ്യൂസിയത്തിലെ പ്രധാന കവാടം അടഞ്ഞിരുന്നു …..

” പിടിക്കവനെ ….. മ് ……. വേഗം ….. ”

അകത്ത് നിന്ന് സെക്യൂരിറ്റി ജീവനക്കാരുടെ ആക്രോശിച്ചുള്ള ഉയർന്ന ശബ്ദം കേട്ട് പ്രധാന ഹാളിൽ നിന്നവരുടെ എല്ലാവരുടെയും നോട്ടം ഉള്ളിലേക്കായി , എന്താണ് കാര്യമെന്നറിയാതെ എല്ലാവരെയും പോലെ അവന്തികയും ഒരൽപ്പം ഭയന്നിരുന്നു ….