✮കൽക്കി࿐ (ഭാഗം – 11 {അധ്യായം – 2 ആരംഭം} ) വിച്ചു [ചെകുത്താനെ സ്നേഹിച്ച മാലാഖ ] 859

കൈകൾ ഉയത്തിപ്പിടിച്ച് നിന്ന ആ യുവാവ് അൽപ്പം ദൂരെ മുന്നിൽ നിൽക്കുന്ന സെക്യൂരിക്കാരെയും ഭയന്ന് പരിഭ്രാന്തിയോടെ ചുറ്റും നിൽക്കുന്ന ആൾക്കാരെയും ഒന്ന് നോക്കി . എന്നിട്ട് പതിയെ അവൻ തന്റെ കൈകൾ അൽപ്പമെന്ന് താഴ്ത്തിയ ശേഷം സെക്യൂരിറ്റിക്കാരെ നോക്കി അവർക്ക് നേരെ തന്റെ രണ്ട് കൈകളിലേയും നടുവിരൽ ഉയർത്തിക്കാണിച്ചു , എന്നിട്ട് അവൻ തന്റെ വലത് കൈ വേഗത്തിൽ അരയിലും തോളിലുമായി കിടക്കുന്ന ആ ബാഗിനടുത്തേയ്ക്ക് നീക്കി .

അത് കണ്ടതും അവൻ ആയുധധാരിയാണെന്ന തോന്നലിൽ ആ സെക്യൂരിറ്റി ജീവനക്കാർ അവന്റെ നെഞ്ച് ലക്ഷ്യമാക്കി വെടിയുതുർത്തു . തോക്കുകളിൽ നിന്ന് ഉച്ചത്തിലുള്ള വെടിശബ്ദമുയർന്നു , രണ്ട് മൂന്ന് ബുള്ളറ്റ് ആ യുവാവിന്റെ നെഞ്ച് ലക്ഷ്യമാക്കി പാഞ്ഞു . ആ ശബ്ദം കേട്ട് ചുറ്റും നിന്നവർ കണ്ണുകളടച്ച് തങ്ങളുടെ രണ്ട് കൈകളും കൊണ്ട് കാതുകൾ പൊത്തിപ്പിടിച്ചു കൊണ്ട് മുഖം വെട്ടിച്ചു , പലയിടങ്ങളിൽ നിന്നും ഭയന്നുള്ള നിലവിളിയും ഉയർന്നു …..

വെടിയുതിർത്തപ്പോൾ ഉണ്ടായ ആ ശബ്ദത്തിന് ശേഷം ഒരു നിമിഷത്തേയ്ക്ക് എങ്ങും നിശബ്ദത മാത്രം . ഭയന്ന് കണ്ണുകളടച്ച് വിറങ്ങലിച്ച് നിന്ന ആൾക്കാർ പതിയെ മുഖമുയർത്തി കണ്ണുകൾ തുറന്ന് മുന്നോട്ട് നോക്കി …..

വെടിയുണ്ടകൾ നെഞ്ചിൽ ഏറ്റ് വാങ്ങിയ ആ യുവാവ് വേഗത്തിൽ മുട്ടുകൾ കുത്തി നിലത്തിരുന്ന ശേഷം പതിയെ നെഞ്ചിടിച്ച് കമഴ്ന്ന് നിലത്തേയ്ക്ക് വീഴുന്ന കാഴ്ചയാണ് എല്ലാവരും കണ്ടത് ….

എല്ലാവരുടെയും മുഖത്ത് ഭയം എന്ന വികാരം മാത്രം , അപ്രതീക്ഷിതമായി നടന്ന സംഭവം . ഇപ്പൊ ദാ ഒരാൾ വെടിയേറ്റ് മുന്നിൽ മരിച്ചു കിടക്കുന്നു , കാലുകൾ നിലത്ത് ഉറച്ച് പോയത് പോലെയായിരുന്നു എല്ലാവരുടെയും ഭയന്നുള്ള ആ നിൽപ്പ് .