നിയോഗം 3 The Fate Of Angels Part VII (മാലാഖയുടെ കാമുകൻ) 2805

“ഇതോടെ റോഷന്റെ മരണം ഉറപ്പാണ്.. അതും അവൻ സ്നേഹിക്കുന്ന ഒരാളിൽ നിന്നും.. നിയോഗം തടുക്കാൻ ആകില്ല അറോറ…”

അവൾ കണ്ണുകൾ അടച്ചു മെല്ലെ പറഞ്ഞപ്പോൾ അറോറ തലതാഴ്ത്തി.. നീർ തുള്ളികൾ താഴേക്ക് വീണു ചിതറിതെറിച്ചു.. അവളുടെ സ്വപ്‌നങ്ങൾ പോലെ…

“അപ്പോൾ മുത്തശ്ശി പറഞ്ഞത്?”

അവൾ തേങ്ങലോടെ ചോദിച്ചു.. ലൈക അവളെ ഒന്ന് നോക്കി..

“അത് റോഷൻ ആയിരിക്കില്ല.. ഇപ്പോൾ അവന്റെ ഭാവി ഇരുട്ടാണ്.. ഇരുൾ മരണമാണ്.. അതും ഇവിടെ വച്ച്..”

“ഇവിടെ വച്ചോ????”

അവൾ ശബ്ദം ഉയർത്തി ചോദിച്ചു..

“അതെ….ഈ പ്ലാനെറ്റിൽ വച്ച്.. നമ്മളുടെ രക്ഷയും ഞാൻ കാണുന്നില്ല.. റോഷന്റെ മരണം നടക്കും..

അതിന് അപ്പുറത്തേക്ക് മുഴുവൻ ഇരുളാണ്.. അതെങ്ങനെ എന്നെനിക്ക് അറിയില്ല.. ഇതുവരെ കാണാത്ത ഒരു.. എനിക്ക് അറിയില്ല…”

അവൾ മെല്ലെ പറഞ്ഞപ്പോൾ തല താഴ്ത്തി ഇരുന്നു അറോറ..

അതിന് ശേഷം ഒന്നും മിണ്ടാതെ പുറത്തേക്ക് നടന്നു..

***
King’s palace, Planet Of Reptilians

ഞാൻ ഇറങ്ങി ചെന്നത് പത്തോളം പടയാളികളുടെ മുൻപിലേക്കാണ്..

അവർ ഒന്നും മിണ്ടാതെ കതക് തുറന്നു തന്നു.. ഞാൻ മെല്ലെ അകത്തേക്ക് കയറി…

വളരെ വലിയ ഒരു ഹാൾ.. വലുതെന്ന് എന്ന് പറഞ്ഞാൽ അത്രക്കും വലുത്.. നടുക്ക് വലിയ ഒരു വൃത്തം.. അതൊരു യുദ്ധക്കളം ആണെന്ന് എനിക്ക് മനസിലായി.

അതിന് ചുറ്റും കുറച്ചു പടികൾ മുകളിലേക്ക്..

ദൂരെ മാറി അങ്ങേ മൂലക്ക് വലിയ സ്വർണ നിറമുള്ള സിംഹാസനം.. അതിന്റെ അല്പം മാറി മറ്റു കസേരകൾ..