ഡെറിക് എബ്രഹാം 3 [അഹമ്മദ് ശഫീഖ് ചെറുകുന്ന്] 222

അധികം വൈകാതെ തന്നെ അവർ കോടതി വളപ്പിലെത്തി…. അത്രയും സെക്യൂരിറ്റി ചെക്കിങ്ങും പോലീസുകാരെയും കണ്ടപ്പോഴാണ് കാര്യത്തിന്റെ ഗൗരവം ചാന്ദ്നിക്ക്‌ മനസ്സിലാകുന്നത്…അതൊക്കെ കണ്ട് അവൾ പേടിച്ചെങ്കിലും , ബുദ്ധിമുട്ടൊന്നുമില്ലാതെ അവർ അകത്തേക്ക് കടന്നു…

പ്രതീക്ഷിച്ചത് പോലെ തന്നെ വിധി അനുപമയ്ക്ക് അനുകൂലമായി തന്നെ വന്നു..കേസിലെ മുഖ്യപ്രതികളായ സെൽവം, തങ്കരാജൻ,പൗർണ്ണമ്മി,ബാബു എന്നിവർക്ക് ജീവപര്യന്തം തന്നെ വാങ്ങിക്കൊടുക്കാൻ അനുപമയ്ക്ക് കഴിഞ്ഞു…. കോടതി നടപടികൾക്ക് ശേഷം സന്തോഷത്തോടെ , പോലീസ് അകമ്പടിയോട് കൂടി അനുപമയും മധുവങ്കിളും ചാന്ദ്നിയും പുറത്തേക്കിറങ്ങി…. മാധ്യമങ്ങളെ കണ്ട് തന്റെ സന്തോഷവും സപ്പോർട്ട് ചെയ്തതിനുള്ള നന്ദിയും അറിയിച്ചതിന് ശേഷം പുറത്തേക്കിറങ്ങാൻ വേണ്ടി നിൽക്കുമ്പോഴാണ് അകത്ത് നിന്നും തന്റെ ഒപ്പിന് വേണ്ടി വക്കീൽ വിളിച്ചത്…

ഒപ്പിട്ടതിന് ശേഷം അനുപമ പുറത്തേക്കിറങ്ങാൻ തുടങ്ങുമ്പോഴാണ് പെട്ടെന്നൊരു ഇടിമുഴക്കമുണ്ടായത്.. കുറച്ചു ദൂരെ നിന്നും ഭീകരമായ ശബ്ദത്തോട് കൂടി ഒരു പൊട്ടിത്തെറിയോട് കൂടെ എന്തൊക്കെയോ ചിന്നിച്ചിതറി…

കൂടി നിന്ന ജനങ്ങളും മാധ്യമങ്ങളും കുതറിയോടി…. കുറച്ചു നിമിഷത്തേക്ക് സംഭവിച്ചതെന്താണെന്നറിയാതെ എല്ലാവരും തരിച്ചു നിന്നു… പതിയെ പതിയെ മനസ്സിലായി,അനുപമ വന്ന കാറാണ് സ്ഫോടനത്തിൽ തകർന്നിരിക്കുന്നത്..വക്കീൽ ഒപ്പിടാൻ വിളിച്ചില്ലായിരുന്നെങ്കിൽ ഒരു പക്ഷേ, ചിന്നിച്ചിതറിയതിൽ അവരുമുണ്ടാകുമായിരുന്നു……അനുപമയ്ക്കും ചാന്ദ്നിയ്ക്കും വല്ലാത്തൊരു ഷോക്കായി അത് കണ്ടപ്പോൾ….അവിടെയാകമാനം പുകച്ചുരുളുകൾ കൊണ്ട് മൂടപ്പെട്ടു…എല്ലാവരുമാകെ പരിഭ്രാന്തരായി…പലയിടത്ത് നിന്നും കരച്ചിലും നിലവിളിയും കേൾക്കുന്നു…