ഡെറിക് എബ്രഹാം 3 [അഹമ്മദ് ശഫീഖ് ചെറുകുന്ന്] 222

മധുശേഖരൻ. എം. എൽ. എ അനുപമയുടെ കസിനാണ്..അദ്ദേഹവും കേസിന്റെ ഭാഗമായി ചെന്നൈയിൽ എത്തിയിട്ടുണ്ട്…

മധുശേഖരൻ നിർദ്ദേശിച്ചത് പോലെ അവരുടെ കാർ, കോടതിയുടെ കുറച്ചു ദൂരത്തായി ഒരു ഗ്രൗണ്ടിൽ പാർക്ക്‌ ചെയ്തു… കുറച്ചു നേരം കഴിഞ്ഞപ്പോൾ പോലീസ് എസ്കോട്ടോട് കൂടെ മധുശേഖരൻ എത്തി… മധുവിനെ കണ്ടപ്പോൾ മൂന്ന് പേരും കാറിൽ നിന്ന് പുറത്തേക്കിറങ്ങി..

“അനൂ… നിനക്ക് വീട്ടിലേക്ക് തിരിച്ചു പോകാനുള്ള ഒരു ഉദ്ദേശവുമില്ലേ…? ”

“അതെന്താ അങ്കിൾ അങ്ങനെ ചോദിച്ചത് ? ”

“നിന്നോട് ഞാൻ ആയിരം പ്രാവശ്യം പറഞ്ഞിരുന്നു..കണ്ട റൗഡികളെയും കൂട്ടി ഇങ്ങേക്ക് വന്നേക്കരുതെന്ന് ”

“പിന്നെ, എന്റെ ചേച്ചിയുടെ കൂടെ ഞാനല്ലേ വരേണ്ടത് ? ”

” നിന്നോട് ഞാൻ ചോദിച്ചില്ല.. ചോദിച്ചാൽ മറുപടി പറഞ്ഞാൽ മതി ”

“അങ്കിൾ.. അവനൊരു പ്രശ്നവും ഉണ്ടാക്കില്ല… അവൻ കോടതിയുടെ അരികിലേക്ക് തന്നെ വരില്ല…. ഇവിടെ കാറിൽ ഇരുന്നോളും ”

“ചേച്ചീ… ഞാൻ ”

അനുപമ ആദിയെ കണ്ണുരുട്ടി പേടിപ്പിച്ചു…

“ഹാ… അങ്ങനെയെങ്കിൽ അങ്ങനെ… ഞാൻ ഇവിടെ നിന്നോളാം… ഇനി ഞാൻ വന്നിട്ട് ആരുടേയും ബി. പി കൂടേണ്ട…”

ഇടയ്ക്കണ്ണിട്ട് മധുവങ്കിളിനെയും നോക്കി ആദി പറഞ്ഞു…

അങ്ങനെ അനുപമയും,കൂടെ എല്ലാ ഫയൽസുമായി ചാന്ദ്നിയും മധുവങ്കിളിന്റെ കൂടെ പോയി…ആദിയെ വിശ്വാസമില്ലാത്തത് കൊണ്ട് , അവൻ ഗ്രൗണ്ടിന് പുറത്തേക്ക് വരാതിരിക്കാൻ , കുറച്ചു പോലീസുകാരെ അവിടെ കാവലാക്കിയിട്ടാണ് മധു പോയത്…