🌞 ഋതുഭേദങ്ങൾ 🌧️ 14 [ഖല്‍ബിന്‍റെ പോരാളി 💞] 1096

തിരിച്ചു വൈദരത്ത് എത്തിയപ്പോ രാത്രിയായി. ഭക്ഷണം കഴിച്ചു കിടക്കാന്‍ പോയി. ദേവിന് അനഘയോട് സംസാരിക്കണമെന്നുണ്ടായിരുന്നു. എന്നാല്‍ അതിന് പോലും അവസരം കൊടുക്കാതെ മാളുട്ടി ഉറങ്ങുന്ന കൂട്ടത്തില്‍ അനഘയും ഉറങ്ങിയിരിയിരുന്നു. ദേവിന് സന്തോഷമോ വിഷമമോ എന്തോക്കെയോ സമ്മിശ്ര വികാരങ്ങള്‍ കയറി വന്നു. അവന്‍റെ മനസ് ആകെ ഇളകി മറിയുകയായിരുന്നു. മനസില്‍ അപ്പോഴും നന്ദന പറഞ്ഞ വാക്കുകള്‍ മാത്രമായിരുന്നു. എന്തോ അവളുടെ വാക്കുകള്‍ കേട്ടപ്പോ സന്തോഷം കൊണ്ടോ, സങ്കടം കൊണ്ടോ കണ്ണുകള്‍ നിറഞ്ഞു വന്നിരുന്നു. ദേവ് കിടന്നെങ്കിലും മനസ് ശാന്തമാകാത്തതിനാല്‍ സമയത്ത് ഉറക്കം വന്നില്ല.

പിറ്റേന്ന് ഉച്ചകഴിഞ്ഞതോടെയാണ് ദേവും അനഘയും മാളുട്ടിയും കോയമ്പത്തൂരിലേക്ക് പുറപ്പെട്ടത്. ഹാള്‍ ടിക്കറ്റിലെ എക്സാം സെന്‍ററിനെ പറ്റി ഗൂഗിളില്‍ തപ്പി കണ്ടെത്തിയെങ്കിലും പിറ്റേന്ന് രാവിലെ വൈദരത്ത് നിന്ന് പുറപ്പെട്ട് റിസ്ക് എടുക്കാന്‍ അവര്‍ തയ്യാറായിരുന്നില്ല. അതിനാല്‍ ഇന്ന് രാത്രി കോയമ്പത്തൂര്‍ തങ്ങി രാവിലെ നേരെ എക്സാം ഹാളിലേക്ക് പോകാന്‍ തിരുമാനമാക്കി. അത്യാവശ്യം നല്ലൊരു ഹോട്ടലില്‍ ഓണ്‍ലൈനായി റൂം ബുക്ക് ചെയ്തിരുന്നു.

യാത്ര തുടങ്ങി കഴിഞ്ഞ് അനഘ ഓര്‍മകളുടെയും ചിന്തകളുടെയും ചിന്താവലയത്തിലായിരുന്നു. മാളുട്ടി ആദ്യമെല്ലാം യാത്രയാസ്വദിച്ചെങ്കിലും കുറച്ചു കഴിഞ്ഞപ്പോള്‍ അവള്‍ ഉറക്കം തുങ്ങാന്‍ തുടങ്ങി. അതോടെ ജീപ്പിനുള്ളം നിശബ്ദമായി. തന്‍റെ കൈയില്‍ കിടന്നുറങ്ങുന്ന മാളുട്ടിയെ നോക്കി അനഘ വീണ്ടും ചിന്തകളിലേക്ക് അകപ്പെട്ടുപോയി. എക്സാം എഴുതി ഒരു മാസത്തിനുള്ളില്‍ ക്ലാസ് തുടങ്ങും എന്നാണ് സൈറ്റില്‍ പറഞ്ഞിരിക്കുന്നത്. അതിനര്‍ത്ഥം ഇനി അത്രയും ദിനങ്ങള്‍ മാത്രം…. മാളുട്ടിയെ പറ്റി ചിന്തിക്കുമ്പോള്‍ അനഘയ്ക്ക് എക്സാം പൊട്ടി തിരിച്ചു മാളുട്ടിയുടെ അടുത്തേക്ക് വരാന്‍ തോന്നും എന്നാല്‍ ദേവേട്ടന്‍റെ കാര്യം ആലോചിക്കുമ്പോള്‍ എല്ലാം മാറി മറയും…. ഇടയ്ക്ക് അവള്‍ ഇടം കണ്ണിട്ട് ദേവിനെ നോക്കും. എവിടെ… അങ്ങേര് ഡ്രൈവിംഗില്‍ ശ്രദ്ധ ക്രേന്ദ്രികരിച്ചിരിക്കുകയാണ്. ചുറ്റും നോക്കുന്നത് പോലുമില്ല…. ഇടയ്ക്ക് സൈഡ് ഗ്ലാസിലേക്ക് നോക്കുന്നത് കാണാം… ഭാഗ്യം….

എന്നാല്‍ അനഘ ജീപ്പില്‍ കയറിയത് മുതല്‍ ചിന്തിച്ചിരിക്കുന്നത് ദേവ് അറിയുന്നുണ്ടായിരുന്നു. നേരിട്ട് നോക്കാതെയിരിക്കാന്‍ അവന്‍ ജീപ്പിനുള്ളിലെ ബാക്ക്മിറര്‍ അതിനനുസരിച്ച് സെറ്റ് ചെയ്ത് വെച്ചിരുന്നു. ദേവ് ഇടയ്ക്കിടെ അതിലൂടെ നോക്കി കാര്യങ്ങള്‍ മനസിലാക്കുന്നുണ്ടായിരുന്നു. ഡ്രൈവിംഗിലും ദേവിന്‍റെ ചിന്തകള്‍ നന്ദന പറഞ്ഞ കാര്യങ്ങളായിരുന്നു. ഇടയ്ക്ക് ദേവിന് തോന്നി പോവും അനഘയെ അങ്ങ് ചേര്‍ത്ത് പിടിച്ചു കാര്യം സംസാരിച്ചു തീര്‍ക്കാമെന്ന്…. പക്ഷേ അങ്ങനെ ചെയ്താ ചിലപ്പോ അവള് എക്സാമിന് ഉഴപ്പും… അത് പാടില്ല… മാളുട്ടിയോടുള്ള സ്നേഹത്തിന്‍റെ പുറത്താണേങ്കില്‍ പോലും അവളുടെ സ്വപ്നം തകര്‍ത്ത് ഒരു പരുപാടിയ്ക്കും താന്‍ സമ്മതിക്കില്ലെന്ന് ദേവ് തിരുമാനിച്ചു. അതിനാല്‍ എക്സാം കഴിയും വരെ പഴയപോലെ നില്‍ക്കാന്‍ ദേവ് തിരുമാനിച്ചു.