ആ രാത്രിയിൽ 2 [പ്രൊഫസർ ബ്രോ] 172

“എടാ,… ഞാൻ ആ ശേഖരനോട് അന്ന് തന്നെ പറഞ്ഞതാ എനിക്കവനെ വേണം എന്ന്, നമ്മുടെ കമ്മീഷ്ണറെയും വിളിച്ചു അന്വേഷിച്ചു, ഒരു ഓട്ടോയിലാണ് അവൻ വന്നത് എന്നല്ലാതെ ഒരു തെളിവും കിട്ടിയില്ലത്രേ…”

“ഹ്മ്മ്… ശ്യാമേ… വണ്ടി ജീവന്റെ വീട്ടിലേക്ക് കയറ്റിക്കൊ…”

♦️♦️♦️♦️♦️

അവർക്ക് പിന്നാലെ വന്ന ഇന്നോവയുടെ വേഗത പതിയെ കുറഞ്ഞു, അതനുസരിച്ച് രാജനും വേഗത കുറച്ചു

“ദേ വലത് സൈഡിലേക്ക് ഇൻഡിക്കേറ്റർ ഇട്ടേക്കുന്നു… പോകുന്നതിന് ഇടക്ക് എവിടെയെങ്കിലും നിർത്തണമെങ്കിൽ ഇവർക്ക് നേരത്തെ ഒന്ന് പറഞ്ഞൂടെ…”

“കുറച്ചു ദൂരം കൂടി അല്ലെ ഉള്ളു സർ… അയാൾ എന്തെങ്കിലും ചെയ്യട്ടെ…”

രാജൻ മന്ത്രിയുടെ വാഹനം കയറിപ്പോയ വീടിന്റെ ഗെയ്റ്റിന് മുൻപിലായി ബൊലേറോ നിർത്തി,  അപ്പോഴാണ് ദേവൻ ചുറ്റുപാടും ശ്രദ്ധിക്കുന്നത്

“രാജേട്ടാ… ഇത് ആ വീടല്ലേ…”

ദേവൻ ചൂണ്ടിയ ഭാഗത്തേക്ക് നോക്കിയപ്പോൾ ആണ് രാജനും അത് കാണുന്നത് , അന്ന് ദേവന് തലക്ക് അടി കിട്ടിയ അതേ വീട്

“അതേ…ആ വീട് തന്നെ, പക്ഷെ ഇയാൾക്കെന്താ ഇവിടെ  കാര്യം, ആ …അല്ല അതൊക്കെ നമ്മൾ എന്തിനാ അറിയുന്നത്… നമ്മുടെ ജോലി അയാൾക്ക് പൈലറ്റ് പോകുക എന്നുള്ളതാണ്… ആയാൾ നമ്മുടെ സ്റ്റേഷൻ പരിധി വിട്ടാൽ നമ്മുടെ ജോലി കഴിഞ്ഞു”

രാജൻ പറയുന്നതൊന്നും ശ്രദ്ധിക്കാതെ ദേവൻ വേറെ എന്തോ ചിന്തയിൽ ആയിരുന്നു.

മന്ത്രിയുടെ വാഹനത്തിന് അകമ്പടി സ്വീകരിക്കാൻ അടുത്ത വാഹനം വന്നതും രാജനും ദേവനും തിരിച്ചു പോന്നു. അപ്പോഴും ദേവന്റെ മുഖത്തുള്ള മ്ലാനത രാജൻ ശ്രദ്ധിച്ചു

“എന്താ സർ…കുറെ നേരമായല്ലോ ചിന്ത…”

“അല്ല രാജേട്ടാ… ആ വീട് അയാൾക്ക് അത്രയും അടുപ്പമുള്ള വീടാണെങ്കിൽ അന്ന് നടന്ന മോഷണ ശ്രമത്തിനെക്കുറിച്ച് അന്വേഷിക്കാൻ എന്തെങ്കിലും വിധത്തിലുള്ള പ്രഷർ വരേണ്ടതല്ലേ… പക്ഷെ അങ്ങനെ ഒന്നും ഉണ്ടായില്ലല്ലോ…”

“ഏത് വീട് … ഓ അതോ… സർ ഇപ്പോഴും അതോർത്തുകൊണ്ട് ഇരിക്കുകയാണോ… അന്ന് വീട്ടിൽ കയറിയ ആൾ ഉള്ളിൽ കയറുകയോ ഒന്നും മോഷ്ടിക്കുകയോ ചെയ്തില്ലല്ലോ അതാവും…”