?കരിനാഗം 8? [ചാണക്യൻ] 384

“അറിഞ്ഞൂടാ യക്ഷമി വല്ലാത്തൊരു വീർപ്പുമുട്ടൽ……. പുറത്തൊക്കെ ഒന്നിറങ്ങി നടന്നാലോ?”

മഹി തന്റെ ഗതികേട് വെളിപ്പെടുത്തി.

“പാടില്ല മഹി ഇൻഫെക്ഷൻ ഉണ്ടാകും…… മാറ്റാരുമായും സമ്പർക്കം വേണ്ട….. കൂടാതെ പോലീസുകാർ ഗ്രാമം മൊത്തം റോന്തു ചുറ്റുന്നുണ്ടെന്ന് അറിഞ്ഞൂടെ?”

യക്ഷമി ഒരു താക്കീത് എന്ന പോലെ പറഞ്ഞു.

“അപ്പൊ അവരെന്റെ പൊക കണ്ടേ അടങ്ങൂ അല്ലെ?”

സഹികെട്ടാണ് അവനത് ചോദിച്ചത്.

“ആന കരിമ്പിൻ കാട്ടിൽ കേറിയ പോലെ അവിടൊക്കെ മെതിച്ചിടുമ്പോൾ ഓർക്കണമായിരുന്നു……. എത്ര പേരുടെ ജീവനാ പൊലിഞ്ഞതെന്ന് ഓർമ്മയുണ്ടോ?”

ശബ്ദത്തിന് അൽപം കടുപ്പം കൊടുത്തുകൊണ്ടാണ് യക്ഷമി അത്‌ ചോദിച്ചത്.

അതുകേട്ടതും മഹി നിശബ്ദനായി നിന്നു തല കുനിച്ചു.

ആ കാഴ്ച കണ്ടതും പറഞ്ഞത് കൂടിപ്പോയോ എന്ന് യക്ഷമിക്കും തോന്നാതിരുന്നില്ല.

“ഹാ അതു വിട് മഹി……. മാദ്രിയമ്മ മുറിയിലുണ്ട്……. അമ്മയുടെ ഈ രാജകുമാരനെ കാണാൻ വന്നതാ……..നമുക്ക് ഒന്നു പോയി കണ്ടേക്കാം……. പിന്നെ ഈ ടാറ്റൂവിനെ കുറിച്ചും തിരക്കാം.”

മഹിയുടെ കയ്യിലേക്ക് വിരൽ ചൂണ്ടിക്കൊണ്ട് അവൾ പറഞ്ഞു.

അത്‌ കേട്ടതും അവന്റെ കണ്ണുകൾ വിടർന്നു.

സ്വന്തം വംശ പറമ്പരയെ കുറിച്ചറിയാൻ രാജകുമാരനു ഇതുപോലുള്ള സൂചനകൾ കൊടുക്കേണ്ട സമയമായെന്ന് യക്ഷമിക്ക് തോന്നിയിരുന്നു..