?കരിനാഗം 8? [ചാണക്യൻ] 384

“മകളെ…… അഞ്ചാലകന്റെ അറിയിപ്പുണ്ട്…… മറ്റൊരു കരിനാഗ രാജകുമാരനെ കൂടി കണ്ടെത്തിയിരിക്കുന്നുവെന്ന്”

പുച്ഛത്തോടെയായിരുന്നു കാളിയൻ അത്‌ പറഞ്ഞത്.

“നാമും ശ്രവിച്ചിരുന്നു അങ്ങനൊരു സന്ദേശം…… എന്താണ് ചെയ്യേണ്ടത് അച്ഛൻ പറഞ്ഞാലും.”

രുദ്രരൂപ ഭാവ്യതയോടെ തല കുനിച്ചു.

ഇപ്പോഴും അവിടെ ചന്ദനത്തിന്റെ വാസന അലയടിക്കുന്നുണ്ട്.

“കരിനാഗ വംശജരുടെ ആ പ്രതീക്ഷയും മുളയിലേ നുള്ളിയേക്ക് രുദ്രാ……. അയാൾ ആരായാലും ഏത് നാഗമായാലും മനുഷ്യനായാലും വധിച്ചിരിക്കണം……. നീ ഇന്ന് തന്നെ ഭൂമിയിലേക്ക് പുറപ്പെടണം മകളെ…… ആ മരണ വാർത്തയുമായി ആവണം എൻറെ മകളുടെ തിരിച്ചു വരവ്……. സർപ്പങ്ങളെ കീഴ്പ്പെടുത്താമെന്ന വ്യാമോഹം അങ്ങനൊരു നാഗങ്ങൾക്കും ഇനിമേൽ ഉണ്ടാവരുത്…….”

കാളിയൻ അരിശത്തോടെ രുദ്രരൂപയ്ക്ക് മുന്നിലേക്ക് ഇഴഞ്ഞിഴഞ്ഞു വന്നു.

തന്റെ പിതാവിന്റെ അമർഷം മകളായ രുദ്രയ്ക്ക് ഊഹിക്കാവുന്നതായിരുന്നു.

“അച്ഛാ……. അങ്ങയുടെ ആഗ്രഹം നാം ജീവൻ വരെ കൊടുത്തും സാധിച്ചിരിക്കും…… ജീവന്റെ അവസാന കണിക ഉടലിൽ നിന്നും യാത്രയാകുന്ന വരെ സർപ്പങ്ങൾക്കും സർപ്പ ലോകത്തിനും വേണ്ടിയും ഞാൻ പോരാടും…….. മഹത്തായ ഈ സർപ്പ ലോകത്തിന്റെ പേരും യശസും ഈരേഴുലകം വരെ പ്രതിധ്വനിക്കും………”

ഉറച്ചതായിരുന്നു രുദ്രരൂപയുടെ വാക്കുകൾ.