?കരിനാഗം 8? [ചാണക്യൻ] 384

“വിശ്വസിക്കാവുന്ന സ്രോതസ്സുകളിൽ നിന്നുമാണ് ഈ വാർത്ത സർപ്പ രാജൻ……. വേണ്ടുന്നത് വേണ്ടതു പോലെ ചെയ്യുക…… അഞ്ചാലകൻ വിട വാങ്ങുന്നു.”

അഞ്ചാലകൻ കൈകൾ കൂപ്പിക്കൊണ്ട് സർപ്പ രാജനെ നമസ്കരിച്ചു.

ശേഷം തന്റെ ശിഷ്യന്മാരായ സർപ്പങ്ങളുമായി തിരികെ ഇടനാഴിയുടെ പ്രധാന വാതിലിലൂടെ പതിയെ പുറത്തേക്ക് ഇഴഞ്ഞു പോയി.

ഈ സമയം സർപ്പ സഭയിൽ എല്ലാവരും പരസ്പരം രഹസ്യം പറച്ചിൽ തുടങ്ങി.

കടന്നൽ കൂടുന്നത് പോലുള്ള മൂളൽ അവിടം വ്യാപിച്ചതും കാളിയൻ കൈകൾ ഉയർത്തി പിടിച്ചു.

അതോടെ സർപ്പ സഭ നിശബ്ദമായി.

“രുദ്രരൂപാ………..”

ആ സഭ കുലുങ്ങുമാറ് കാളിയൻ അലറി വിളിച്ചു.

വല്ലാത്തൊരു ഇടി മുഴക്കം പോലെ അയാളുടെ കണ്ഠത്തിൽ നിന്നുമുള്ള ശബ്ദം അവിടെ മുഴങ്ങി.

ആ ശബ്ദം അവിടമാകെ പ്രതിധ്വാനിച്ചു.

പൊടുന്നനെ ആ സഭയിലാകെ ചന്ദനത്തിന്റെ മണം വ്യാപിച്ചു.

മനം മയക്കുന്ന ചന്ദന ഗന്ധം.

പല സർപ്പങ്ങളും ആ പരിമളം ആവോളം നാസികയിലൂടെ വലിച്ചെടുത്തു.

ആ വാസന തിരിച്ചറിഞ്ഞതും കാളിയന്റെ മുഖത്തു സംതൃപ്തി വന്നു നിറഞ്ഞു.