💞💞 അവൾ രാജകുമാരി-3💞💞[ ചെകുത്താനെ സ്നേഹിച്ച മാലാഖ ] 733

 

“എന്താ ചേട്ടായി എന്താ ആലോചിക്കുന്നേ ഒരു ടെൻഷൻ ഉള്ള പോലെ ? ”

 

ഗീതു രാഹുലിനോട് ചോദിച്ചു. .

 

” ഏയ് ഒന്നൂല്ല . ”

 

രാഹുൽ ഒരു ഒഴുക്ക് മട്ടിൽ ഉത്തരം പറഞ്ഞു. ഗീതുവിന് മനസ്സിലായി ചേട്ടന് എന്തോ പറ്റിയിട്ടുണ്ട് എന്ന് . തന്റെ ചേട്ടായി അല്ലെ ഇപ്പോൾ ചോദിച്ചാൽ ഒന്നും വിട്ട് പറയില്ല പതിയെ ചോദിക്കാം എന്ന് കരുതി ഗീതു പിന്നെ ഒന്നും ചോദിച്ചില്ല …. ഉടനെ അടുക്കളയിൽ നിന്ന് ഒരു കപ്പ് ചായയുമായി ശ്രീദേവി വന്നു … രാഹുലിന്റെ മുഖത്തെ മ്ലാനത കണ്ടതും എന്തോ കുഴപ്പം ഉണ്ടെന്ന് ശ്രീദേവിക്കും തോന്നി . ചായ കപ്പ് ടേബിളിൽ വച്ച ശേഷം ശ്രീദേവി രാഹുലിന്റെ തലമുടിയിലൂടെ വിരലോടിച്ചു .

 

” എന്താടാ എന്താ പറ്റിയെ മോന് നേരത്തെ അമ്മ ചെവിക്ക് പിടിച്ചത് വേദനിച്ചോ ?….. ”

 

ശ്രീദേവി അതും പറഞ്ഞ് അവന്റെ മുഖം തനിക്ക് നേരെ പിടിച്ചു അപ്പോഴാണ് രാഹുലിന്റെ നെറ്റിയിലെ മുറിവ് കണ്ടത് .

 

” ഇതെന്താടാ പറ്റിയത് നെറ്റി മുറിഞ്ഞിട്ടുണ്ടല്ലോ …. നേരത്തെ തലമുടി മറഞ്ഞ് കണ്ടതും ഇല്ല . എന്താടാ പറ്റിയേ …. ?”

 

ശ്രീദേവി ചെറിയ പേടിയോടെ ചോദിച്ചു.

 

” അത് അമ്മേ ഇന്ന് കോളേജിൽ ഒരു പ്രശ്നം . ഉണ്ടായി. ”

 

ഗീതുവാണ് പറഞ്ഞത് .

 

” എന്ത് പ്രശ്നം …. ?”

 

ശ്രീദേവി ഉടനെ ചോദിച്ചു .

 

ഗീതു തന്നെ ഫ്രാങ്കോ തടഞ്ഞ് നിർത്തിയതും ഉമ്മ വയ്ക്കാൻ പറഞ്ഞതും രാഹുൽ ഇടപെട്ടതും അടി ആയതും എല്ലാം പറഞ്ഞ് കൊടുത്തു .

 

” ഇവനെ അടിച്ച് നിലത്തിട്ടപ്പോ നീ നോക്കിക്കൊണ്ട് നിന്നു അല്ലേ ….. പിന്നെ എന്തിനാടി നീ ഇവനോടൊപ്പം കളരിയും ബോക്സിങും ഒക്കെ പഠിച്ചത് . നിനക്ക് രണ്ടെണ്ണം കൊടുത്തൂടായിരുന്നോ അവന്മാർക്കിട്ട് …. ”

 

ശ്രീദേവി അതും പറഞ്ഞ് ഗീതുവിന്റെ ചെവിക്ക് പിടിക്കാൻ തുനിഞ്ഞതും അവൾ കുതറി ഓടി അത് കണ്ടപ്പോൾ രാഹുലും അത്രയും നേരത്തെ മനസ്സിലെ ടെൻഷൻ മറന്ന് ചിരിച്ചു.