💞💞 അവൾ രാജകുമാരി-3💞💞[ ചെകുത്താനെ സ്നേഹിച്ച മാലാഖ ] 733

……………………………..

കോളേജ് ലേഡീസ് ഹോസ്റ്റൽ , ആദിഷയുടെ റൂം ….

ആദിഷയുടെ കൂടെ മറ്റൊരു പെൺകുട്ടിയും ഉണ്ട് ഗായത്രി . ഗായത്രി ഫസ്റ്റ് ഇയർ ആണ് വേറെ ഡിപ്പാർട്ട്മെന്റ് . അവർ രണ്ട് പേരും ആണ് ആ റൂമിൽ ഉള്ളത് .

പല ചിന്തകളും വന്ന് മൂടിയപ്പോൾ കിടന്നിട്ട് ഉറക്കം വരാതെ ആദിഷ ബെഡ്ഡിൽ എണീറ്റ് ഇരുന്നു . നോക്കിയപ്പോൾ ഗായത്രി നല്ല ഉറക്കം ആണ് .

വർഷങ്ങളായി അവൾ കാണുന്ന പല തരം സ്വപ്നങ്ങൾ . ആ സ്വപ്നങ്ങളിൽ എല്ലാം ഒരു യുവാവ് ഉണ്ടാകും കണ്ണിൽ കടും നീല കൃഷ്ണമണിയുള്ള ഒരു സുന്ദരനായ യുവാവ് അതും ഒരു യോദ്ധാവിന്റെ രൂപത്തിൽ . പക്ഷെ അവൾ സ്വപ്നം കണ്ട് എണീക്കുമ്പോൾ അവളുടെ ഓർമ്മയിൽ നിന്ന് ആ യുവാവിന്റെ മുഖം മാഞ്ഞിട്ടുണ്ടാകും എന്നാൽ ആ കണ്ണുകൾ ഒരിക്കലും അവളുടെ ഓർമ്മയിൽ നിന്ന് മാഞ്ഞ് പോയിട്ടില്ല അത് എപ്പോഴും അവളുടെ ഓർമ്മയിൽ തെളിഞ്ഞ് വരും . ഇന്ന് ആദ്യമായി താൻ സ്വപ്നത്തിൽ കണ്ടതുപോലുള്ള ആ കണ്ണുകൾ ഉള്ള ഒരു യുവാവിനെ നേരിൽ കണ്ടു . അവൻ രാഹുൽ , രാഹുൽ കൃഷ്ണ …. അവനെ കണ്ടതു മുതൽ എവിടെയോ മുൻപ് കണ്ടിട്ടുണ്ട് എന്ന ചിന്ത അവളെ കീഴ്പ്പെടുത്തിയിരുന്നു , അതുപോലെ സ്വപ്നത്തിൽ കണ്ട ആ യുവാവ് രാഹുൽ ആണോ എന്നുള്ള സംശയവും അവളെ അലട്ടിക്കൊണ്ടിരുന്നു.

‘ ശൊ….. ഒന്നും മനസ്സിലാകുന്നില്ലല്ലോ ….. ? ആ മുഖം കണ്ടതിന് ശേഷം ഒരു സമാധാനവും കിട്ടിയിട്ടില്ല . എന്നാലും ഞാൻ എവിടെ വച്ചോ രാഹുലേട്ടനെ കണ്ടിട്ടുള്ളത് പോലെ ഒരു തോന്നൽ . ഞാൻ സ്വപ്നത്തിൽ കണ്ടിട്ടുള്ള അതേ കണ്ണുകളാണ് രാഹുലേട്ടന് ഒന്നും മനസ്സിലാകുന്നില്ലല്ലോ ….. ഞാൻ സ്വപ്നത്തിൽ കാണുന്നത് രാഹുലേട്ടനെയാണോ ….? എന്തുകൊണ്ടാണ് വർഷങ്ങളായി എന്റെ ഉറക്കത്തിൽ സ്വപ്നരൂപത്തിൽ ആ നീല കണ്ണുള്ള യുവാവ് വരുന്നത് . എന്തുകൊണ്ടാണ് എന്റെ മനസ്സ് അയാളെ നേരിൽ കാണാൻ അമിതമായി ആഗ്രഹിക്കുന്നത് . ഇപ്പോൾ ഇന്ന് രാഹുലേട്ടനെ കണ്ടതു മുതൽ ആ മുഖം വീണ്ടും വീണ്ടും കാണാൻ എന്റെ മനസ്സ് ആഗ്രഹിക്കുന്നതിന്റെ കാരണം എന്താണ് ? . ശൊ ….. ഒന്നും പിടി കിട്ടുന്നില്ലല്ലോ എന്റെ ഈശ്വരാ …… ‘