💘 അരികത്തായാരോ – 7 💘 വിച്ചു [ ചെകുത്താനെ സ്നേഹിച്ച മാലാഖ ] 1836

ഒരക്ഷരം പോലും മിണ്ടാതെ അവൻ ആ റൂമിന്റെ ചുവരിൽ ചാരി അങ്ങനെ നിന്നു .

പത്ത് മിനിറ്റ് കൊണ്ട് മഹേന്ദ്രനാഥിന്റെ കാറ് ഹോസ്പിറ്റലിനു മുന്നിലെത്തി … ടെൻഷനടിച്ച് പരിഭ്രമം നിറഞ്ഞ മുഖത്തോടെ വരുന്ന അയാളെ കണ്ട ഹോസ്പിറ്റലിലെ സ്റ്റാഫുകളൊക്കെ അയാളെ തന്നെ നോക്കി നിന്നു .

അജുവും യദുവും കാഷ്വാലിറ്റിയുടെ മുന്നിൽ നിൽക്കുന്നത് കണ്ടതും മഹേന്ദ്രനാഥ് വേഗം അവിടേയ്ക്ക് നടന്നു …. വിഷമിച്ച് നിൽക്കുന്ന അജുവിന്റെ തോളിൽ ഒന്ന് തട്ടിയ ശേഷം അയാൾ വേഗം അകത്തേയ്ക്ക് കയറാൻ ഡോറിന്റെ മുന്നിലേയ്ക്ക് നീങ്ങി , അയാളെ കണ്ടതും ആ സെക്യൂരിറ്റി കാഷ്വാലിറ്റിയുടെ ഡോറ് അയാൾക്ക് വേണ്ടി തുറന്ന് കൊടുത്തു . മഹേന്ദ്രനാഥ് അകത്ത് കയറിയതും ആ സെക്യൂരിറ്റി വേഗം ഡോറ് തിരികെയടച്ചു . ഇത് കണ്ട അജു സംശയത്തോടെ യദുവിന്റെ മുഖത്തേയ്ക്ക് നോക്കി ,

” ഇത് അവരുടെ ഹോസ്പിറ്റൽ തന്നെയാ …. ”

അജുവിന്റെ നോട്ടം മനസ്സിലാക്കിയെന്നോണം യദു മറുപടി പറഞ്ഞു . തിരികെ മറുപടിയൊന്നും പറയാതെ അജു വീണ്ടും ആ നിൽപ്പ് തുടർന്നു ….
കുറച്ച് സമയം കഴിഞ്ഞതും ദേവിക റൂമിന് പുറത്തേയ്ക്ക് വന്നു .

” എന്താ ദേവു …. എന്താ അവൾക്ക് ? ”

ദേവുവിനെ കണ്ടതും ഒരു പരിഭ്രമത്തോടെ അജു കാര്യം തിരക്കി ….

” അത് …. പേടിക്കാനൊന്നുമില്ല . ബ്ലഡ് പ്രഷർ വേരിയേഷൻ വന്നതാ …. മുൻപും ഇതുപോലെ വന്നിട്ടുണ്ട് … ഇപ്പൊ ഇൻജക്ഷന്റെ മയക്കത്തിലാ … ബോധം വന്നാലുടനെ വീട്ടിലേയ്ക്ക് പോകാമെന്ന് ഡോക്ടർ പറഞ്ഞിട്ടുണ്ട് . വേറെ പ്രശ്നമൊന്നുമില്ല …. ”