💘 അരികത്തായാരോ – 7 💘 വിച്ചു [ ചെകുത്താനെ സ്നേഹിച്ച മാലാഖ ] 1836

” ഓ ….. അങ്ങനെയായിരുന്നോ … അറിഞ്ഞില്ല , സോറി … ”

ഒരു താൽപര്യമില്ലാത്ത മട്ടിൽ അജു പറഞ്ഞ ശേഷം ദൂരേയ്ക്ക് നോക്കിയിരുന്നു . യദുവാകട്ടെ അവൻ പറയുന്നത് കേട്ട് ചിരി കടിച്ച് പിടിച്ച അസ്ഥയിലും …. അപ്പോഴാണ് അതുവഴി അഹാനയും ദേവികയും നടന്ന് പോകുന്നത് അജുവും യദുവും കണ്ടത് …

” അഹാന …… ഒരു സെക്കന്റ് …. ”

യദു അവിടെയിരുന്നു കൊണ്ട് ഉറക്കെ വിളിച്ചു പറഞ്ഞു . ഒപ്പം ഇങ്ങോട്ട് വരാൻ പറയുന്ന രീതിയിൽ മുഖത്ത് എക്സ്പ്രെഷനും ഇട്ടു … അത് കണ്ടതും അഹാനയും ദേവികയും അവരിരിക്കുന്ന കരിങ്കൽ കെട്ടിനടുത്തേയ്ക്ക് നടന്നു …

” അഹാനെ …. ബർത്ത്ഡേയായിട്ട് ചിലവൊന്നുമില്ലേ . ഞാൻ കരുതി ക്ലാസ്സിലെ എല്ലാവർക്കും കുറഞ്ഞത് ഒരു ചിക്കൻ ബിരിയാണിയെങ്കിലും കിട്ടുമെന്ന് …. എന്നാലും എന്റെ പ്രതീക്ഷയൊക്കെ കളഞ്ഞില്ലേ … ”

യദു ഒരു പുഞ്ചിരിയോടെ ചോദിച്ചു ….

” യദുവിനിപ്പൊ ബർത്ത്ഡേയായിട്ട് ഞാൻ ചിലവ് ചെയ്യണം അത്രയല്ലേ ഉള്ളൂ … ഉച്ചയ്ക്ക് ശേഷമുള്ള ക്ലാസ്സ് കട്ട് ചെയ്ത് നമുക്ക് ഇറങ്ങാം , ദാ ഇവളും യദു പറഞ്ഞ കാര്യം ഇപ്പൊ കൂടി പറഞ്ഞതേ ഉള്ളൂ … നിങ്ങൾ തന്നെ പറ എവിടെ പോകണമെന്ന് . ”

അഹാന ഒരു പുഞ്ചിരിയോടെ പറഞ്ഞു . അജു അതിനൊന്നും ശ്രദ്ധ കൊടുക്കാത്ത ഭാവത്തിൽ ദൂരേയ്ക്ക് തന്നെ നോക്കി ഇരിക്കുകയാണ്.

” അതിപ്പൊ ഇങ്ങനെ പെട്ടെന്ന് പറഞ്ഞാൽ … മ് … ഇന്നലേ പറഞ്ഞിരുന്നേൽ ഒന്ന് ചിന്തിക്കാൻ സമയം കിട്ടിയേനെ … ഇതിപ്പൊ …. ആ ബീച്ചിനടുത്ത് ഒരു പുതിയ ഹോട്ടല് തുടങ്ങിയിട്ടുണ്ട് , അവിടുത്തെ റെസ്റ്റോറന്റിലെ ഫുഡ് സൂപ്പറെന്നാ പറഞ്ഞ് കേട്ടത് അവിടേയ്ക്ക് പോയാലോ …. ”