💘 അരികത്തായാരോ – 7 💘 വിച്ചു [ ചെകുത്താനെ സ്നേഹിച്ച മാലാഖ ] 1836

നീ അവനെ വേണ്ട എന്ന് വയ്ക്കാൻ എത്ര ശ്രമിച്ചാലും മനസ്സിനെ നിയന്ത്രിക്കാൻ നോക്കിയാലും അവനോട് ദേഷ്യം കാണിച്ചാലും അവൻ നിന്റെ മനസ്സിൽ സ്ഥാന പിടിച്ചുക്കൊണ്ടിരിക്കും , ഏറ്റവും അധികമായി . ഇന്നലത്തെ നിന്റെ നോട്ടത്തിൽ നിന്നു പോലും ഞാൻ പലതും മനസ്സിലാക്കി …. നീ അവനോട് കാണിക്കുന്ന ദേഷ്യം സത്യത്തിൽ അത് അഭിനയമല്ലേ അവനെ അകറ്റി നിർത്താൻ വേണ്ടി . ”

” ദേവു … ഞാൻ …. ”

അഹാന ഒരു വിങ്ങലോടെ പറഞ്ഞു , പക്ഷെ അവൾക്ക് തുടർന്ന് പറയാൻ വാക്കുകളില്ലായിരുന്നു .

” മ് … നീ ഒന്നും പറയണ്ട … നീ നിന്റെ മനസ്സിൽ തീർത്ത് വെച്ചിരിക്കുന്ന അനാവശ്യമായ ചിന്തകളാ നിന്നെ നിന്റെ ഇഷ്ടങ്ങളിൽ നിന്ന് പിൻതിരിപ്പിക്കുന്നത് .. ആദ്യം നീ ഒന്ന് മനസ്സിലാക്ക് പ്രണവല്ല അർജുൻ , അജുവിന് സ്നേഹത്തിന്റെ വിലയറിയാം അവൻ നിന്നെ തള്ളിക്കളയില്ല . പിന്നെ ഞാൻ പറഞ്ഞില്ലേ അവനോടൊന്നും നീയായിട്ട് പറയണ്ട . ”

” എത്ര നാൾ ? ”

നിറകണ്ണുകളോടെ അഹാന ചോദിച്ചു .

” നമ്മളെക്കൊണ്ട് പറ്റുന്ന അത്രയും നാൾ … അവനെ പറ്റിക്കാൻ വേണ്ടി ചെയ്യുന്നതല്ലല്ലോ …. അവനും ഇഷ്ടമല്ലേ നിന്നെ . പിന്നെ ബാക്കിയല്ലാം വിധി പോലെ … എന്നെങ്കിലും എല്ലാമറിഞ്ഞ ശേഷവും അവൻ നിന്റെ ഒപ്പം നിന്നാൽപ്പിന്നെ അതിൽപരം സന്തോഷം വെറെ ഇല്ലല്ലോ …. അതുവരെ നീ ഹാപ്പിയായിരിക്ക് . ഇങ്ങനെ വീർപ്പ്മുട്ടനുഭവിച്ച് ജീവിക്കാതെ നീ നിന്റെ മനസ്സിന്റെ ഇഷ്ടങ്ങൾക്ക് വില കൊടുക്ക് … എനിക്കുറപ്പാ അവൻ നിന്നെ വിട്ട് കളയില്ല കൂടെ ഉണ്ടാകും . ”