💘 അരികത്തായാരോ – 7 💘 വിച്ചു [ ചെകുത്താനെ സ്നേഹിച്ച മാലാഖ ] 1836

” എന്താടാ കടല് ആദ്യമായി കാണുന്ന പോലെ നോക്കി നിൽക്കുന്നേ …. ? ”

പുറകിലൂടെ ചെന്ന് അജുവിന്റെ തോളിൽ കൈ വച്ച ശേഷം യദു ചോദിച്ചു ….

” ആദ്യമായി കാണുന്ന പോലെ തന്നെയാ എപ്പൊ കണ്ടാലും എനിക്ക് തോന്നാറ് … ഇങ്ങനെ നോക്കെത്താ ദൂരം തിരകളും നോക്കി നിന്നാൽ വല്ലാത്തൊരു ആശ്വാസമാ മനസ്സിൽ …. ”

അജു പതിയെ പറഞ്ഞു …. അപ്പോഴേയ്ക്കും അഹാനയും ദേവുവും അവരുടെ അടുത്തേയ്ക്ക് വന്നു …

” ഞാൻ പോയി ഐസ്ക്രീം വാങ്ങി വരാം …. ”

യദു അവരോട് പറഞ്ഞ ശേഷം മുന്നോട്ട് നടന്നു . ഇടയ്ക്ക് യദു കണ്ണു കൊണ്ട് ദേവുവിനോട് കൂടെ വരാൻ ആംഗ്യം കാണിച്ചതും ….

” യദൂ .. ഞാനും വരുന്നു ”

എന്ന് പറഞ്ഞ് ദേവുവും അവന്റെ പിന്നാലെ ഓടി …

അഹാന മുന്നോട്ട് നീങ്ങി കടലിലെ തിരമാലകൾ നോക്കി നിൽക്കുന്ന അജുവിന്റെ അടുത്തായി ചെന്ന് നിന്നു …. അവൾ തൊട്ടടുത്ത് വന്ന് നിന്നത് പോലും അവൻ അറിഞ്ഞില്ല , മുന്നിലെ തിരമാലകളും നോക്കി ആ കാഴ്ചയിൽ സ്വയം മറന്ന് അങ്ങനെ നിൽക്കുകയാണ് ….

അഹാന ചുറ്റും ഒന്ന് കണ്ണോടിച്ചു . ബീച്ചിൽ അത്യാവശ്യം തിരക്കുണ്ട് , പ്രണയ ജോഡികളും കോളേജ് വിദ്യാർത്ഥികളും കുടുബമായി വന്നവരും അങ്ങനെയങ്ങനെ …….