💘 അരികത്തായാരോ – 7 💘 വിച്ചു [ ചെകുത്താനെ സ്നേഹിച്ച മാലാഖ ] 1836

പത്ത് മിനിട്ടുകൊണ്ട് തന്നെ സിറ്റിയിലെ ഒരു മൾട്ടി സ്പെഷ്യാലിറ്റി ഹോസ്പിറ്റലിന് മുന്നിൽ കാറ് വന്ന് നിന്നു …. അജുവും യദുവും വേഗം ചാടിയിറങ്ങി . അപ്പോഴേയ്ക്കും ഹോസ്പിറ്റലിലെ സ്റ്റാഫ്
സ്ട്രെച്ചറുമായി വേഗം കാറിനടത്തേയ്ക്ക് വന്നു … അജു വേഗം കാറിനുള്ളിൽ നിന്ന് അഹാനയെ കയ്യിൽ കോരിയെടുത്ത് സ്ട്രെച്ചറിൽ കിടത്തി വേഗത്തിൽ തന്നെ സ്റ്റാഫുകൾ സ്ട്രെച്ചറ് മുന്നോട്ട് നീക്കി തൊട്ടടുത്ത അത്യാഹിത വിഭാഗത്തിനുള്ളിലേയ്ക്ക് കയറ്റി . ഒപ്പം ഒരാളോട് മാത്രം ഉള്ളിലേയ്ക്ക് കയറാൻ പറഞ്ഞതും വേഗം ദേവു അകത്തേയ്ക്ക് കയറി , ആ റൂമിന്റെ ഡോറ് വേഗം തന്നെ അവരുടെ മുന്നിൽ അടയ്ക്കപ്പെട്ടു ……

അജുവിന് തന്റെ കൈകാലുകൾ തളരുന്ന പോലെ തോന്നി . എന്ത് ചെയ്യണമെന്ന് ഒരു എത്തും പിടിയും കിട്ടാത്ത അവസ്ഥ , മനസ്സിൽ മുഴുവൻ അവൾക്ക് എന്താണ് സംഭവിച്ചത് എന്ന ആശങ്കയും …. അവൻ വേഗം ഫോണെടുത്ത് മഹേന്ദ്രനാഥിനെ വിളിച്ച് വിവരം പറഞ്ഞു .

പല പ്രാവശ്യം അവളെ ഒന്ന് കാണാൻ അവൻ ശ്രമിച്ചെങ്കിലും ഡോറിന് മുന്നിൽ നിന്ന സെക്യൂരിറ്റി അതിന് സമ്മതിച്ചില്ല …. ഉള്ളിലെ ഭയവും ആശങ്കയും കൊണ്ട് അവൻ പലവട്ടം അൽപ്പം അകലെ നിന്ന് ആ ഗ്ലാസ്സ് ഡോറിനുള്ളിലേയ്ക്ക് തലയെത്തി നോക്കി . പക്ഷെ അവളെ കിടത്തിയിരിക്കുന്ന ബെഡ് പോലും അവന് കാണാൻ സാധിച്ചില്ല ….

” എടാ നീ ഒന്ന് സമാധാനപ്പെട് …. അവൾക്കൊരു കുഴപ്പവും വരില്ല ….. ”

അജുവിന്റെ അപ്പോഴത്തെ അവസ്ഥ കണ്ട് യദു എന്തൊക്കെയോ പറഞ്ഞ് അവനെ ആശ്വാസിപ്പിക്കാൻ ശ്രമിച്ചെങ്കിലും അവന്റെ മനസ്സിൽ അതൊന്നും കയറിയില്ല .