💘 അരികത്തായാരോ – 2 💘 വിച്ചു [ ചെകുത്താനെ സ്നേഹിച്ച മാലാഖ ] 880

പക്ഷെ ഞാൻ അങ്ങോട്ട് നോക്കുമ്പോൾ കാണുന്നത് അവളുടെ തൊട്ടടുത്തിരിക്കുന്ന ദേവിക ഇങ്ങോട്ട് നോക്കി ഇരിക്കുന്നതാണ് . അവളുടെ നോട്ടം മുഴുവൻ ഞാനിരിക്കുന്ന ബഞ്ചിലേയ്ക്കാണ് , പക്ഷെ അത് എന്നെയല്ല മറിച്ച് എന്റെ തൊട്ടടുത്തിരിക്കുന്ന യദുവിനെയാണെന്ന് എനിക്ക് ആദ്യമെ തന്നെ മനസ്സിലായി . രണ്ടും കൂടെ ക്ലാസ്സ് സമയത്തും ആംഗ്യ ഭാഷയിലൂടെ വായുവിൽ പ്രണയ കാവ്യം എഴുതുന്ന പോലെയാണ് എനിക്ക് തോന്നിയത് . അത് കണ്ടിട്ട് സത്യത്തിൽ എനിക്ക് ചിരിയാണ് വന്നത് .

അങ്ങനെ ഉച്ചയ്ക്കുള്ള ഇന്റർവെല്ലിന്റെ ബെൽ മുഴങ്ങിയതും ഞാൻ ബാഗുമെടുത്ത് എണീറ്റു … യദുവിന് വരാൻ ഒട്ടും താൽപര്യമില്ലായിരുന്നു , ഒടുവിൽ ദേവികയോട് പോയി എന്തൊക്കെയോ പറഞ്ഞ ശേഷം എന്നോടൊപ്പം കോളേജിൽ നിന്ന് അവനും ഇറങ്ങി .

കോളേജിലെ പാർക്കിങ് ഷെഡ്ഡിൽ ഒതുക്കി വച്ചിരുന്ന ബുള്ളറ്റുമെടുത്ത് ഞങ്ങൾ നേരെ ലോഡ്ജിലേയ്ക്ക് പോയി . എന്റെ ബാഗും സാധനങ്ങളുമൊക്കെ എടുത്ത ശേഷം റൂം വെകേറ്റ് ചെയ്ത് ഞങ്ങൾ നേരെ യദു താമസിക്കുന്ന വീട്ടിലേയ്ക്ക് തിരിച്ചു . കോളേജിൽ നിന്ന് എട്ടൊൻപത് കിലോമീറ്റർ അകലെയാണ് ഈ വീട് . ഒരു ചെറിയ ടാറിട്ട റോഡിന്റെ സൈഡിലുള്ള മനോഹരമായ ഒരു ഇരുനില വീട് . ഞാൻ ബുള്ളറ്റ് വീടിന് മുന്നിൽ നിർത്തിയതും യദു അതിൽ നിന്ന് ഇറങ്ങി .

” എടാ അജു നീ ഇവിടെ നിൽക്ക് ഞാനൊന്ന് പോയി അങ്കിളിനോട് സംസാരിച്ചിട്ട് വരാം . ”

യദു അതും പറഞ്ഞ് ആ വീടിനുള്ളിലേയ്ക്ക് കയറി പോയി , ഞാൻ ബുള്ളറ്റിൽ ചാരി പുറത്ത് തന്നെ നിന്നു .