💘 അരികത്തായാരോ – 2 💘 വിച്ചു [ ചെകുത്താനെ സ്നേഹിച്ച മാലാഖ ] 880

” ഗുഡ് മോണിങ് മിസ്സ് …. ”

ക്ലാസ്സിലെ എല്ലാവരും ഒരുമിച്ച് ശബ്ദം മുഴക്കിയപ്പോഴാണ് ഞാൻ സ്വബോധത്തിലേയ്ക്ക് മടങ്ങി വന്നത് , നാൻസി മിസ്സായിരുന്നു ഫസ്റ്റ് പിരീഡ് ക്ലാസ്സെടുക്കാനായി വന്നത് ….

” അർജുൻ ….. ”

കൊണ്ടുവന്ന ബുക്കുകൾ ടേബിളിൽ വച്ച ശേഷം മിസ്സ് എന്റെ പേര് വിളിച്ചു …. ഞാൻ ഒന്ന് ഞെട്ടി , ഇന്നത്തെ പോലെ ക്ലാസ്സിലെ എല്ലാവരുടെയും നോട്ടം എന്റെ നേർക്കായി …. യദുവും എന്താണ് കാര്യമെന്നറിയാതെ സംശയത്തോടെ എന്നെ നോക്കി .

” ഇവരെന്തിനാ എപ്പോഴും എന്നെ തന്നെ പൊക്കുന്നത് , എന്റെ പേരല്ലാതെ ക്ലാസ്സിലെ വേറാരുടെയും പേര് മിസ്സിന് ഓർമ്മ നിൽക്കുന്നില്ലേ എന്തോ ? ”

മനസ്സിൽ സ്വയം വിചാരിച്ചു കൊണ്ട് ഞാൻ സീറ്റിൽ നിന്നും പതിയെ എണീറ്റു .

” എന്താ മിസ്സെ ? ”

ഞാൻ കാര്യമെന്തെന്ന് തിരക്കി .

” താനും യദുവും ഇന്നലെ ഉച്ചയ്ക്ക് ശേഷം എവിടെപ്പോയതാ ? ”

” അത് മിസ്സെ താമസിക്കാൻ ഒരു സ്ഥലം ശരിയാക്കാൻ പോയതാ …. ”

ഞാൻ മറുപടി പറഞ്ഞു .

” ഇവരെന്തിനാ ഇതൊക്കെ തിരക്കുന്നേ ? ”

ഞാൻ പതിയെ യദുവിനോട് ചോദിച്ചു .

” എടാ പറയാൻ മറന്നു …. മിസ്സാ നമ്മുടെ ക്ലാസ്സ് ടൂട്ടർ …. ഇത് സ്ഥിരം ഉള്ളതാ കാര്യമാക്കണ്ട ..”

യദു പറഞ്ഞതും ഞാൻ മുന്നോട്ട് നോക്കി നിന്നു .