? അരികത്തായാരോ – 10 ? വിച്ചു [ ചെകുത്താനെ സ്നേഹിച്ച മാലാഖ ] 1132

” എന്താടാ …. എന്താ പറ്റിയേ ? ”

ഓടി വന്ന യദു കാര്യം എന്തെന്ന് തിരക്കി ,
ചെയറിൽ നിന്ന് എണീറ്റതും അജുവിന്റെ ശരീരത്തിലേയും ഷർട്ടിലേയും രക്തപ്പാടുകൾ കണ്ട് അവരൊന്ന് ഞെട്ടി …. യദുവിന്റെ ആ ചോദ്യം കേട്ട് അജു പൊട്ടിക്കരഞ്ഞു , ഏങ്ങലോടെ അവൻ നടന്ന കാര്യങ്ങൾ അവരോട് പറഞ്ഞു . മഹേന്ദ്രനാഥ് ഒന്നും പറയാതെ നിറഞ്ഞ കണ്ണുകളോടെ എല്ലാം കേട്ട് നിൽക്കുന്നുണ്ടായിരുന്നു ….

ഉടനെ I C U വിനുള്ളിൽ നിന്ന് സീനിയർ സർജൻ പുറത്തേയ്ക്ക് ഇറങ്ങി വന്നു …..

” സർ പെട്ടെന്ന് ക്യാമ്പിനിലേയ്ക്ക് വരൂ ….. ”

മഹേന്ദ്രനാഥിനോട് അത്രമാത്രം പറഞ്ഞ ശേഷം അയാൾ തൊട്ടടുത്ത റൂമിനുള്ളിലേയ്ക്ക് കയറി പുറകേ മഹേന്ദ്രനാഥും . ഭയത്തോടെ അജു ഇതെല്ലാം നോക്കി നിൽക്കുന്നുണ്ടായിരുന്നു . ഉള്ളിലെ ഭയത്തോടെ അവനും വേഗം ആ റൂമിനുള്ളിലേയ്ക്ക് കയറി ….

ഡോക്ടർ തന്റെ ചെയറിൽ ഇരുന്നു , എതിരെയുള്ള ചെയറിൽ മഹേന്ദ്രനാഥും , നിറഞ്ഞൊഴുകുന്ന കണ്ണുകളോടെ അജു അവരെ നോക്കിക്കൊണ്ട് തൊട്ടടുത്ത ചുവരിൽ ചാരി നിന്നു ….

” എന്താ സർ എന്റെ മോൾക്ക് …. ? ഇപ്പൊ എങ്ങനെയാ അവൾക്ക് ? ”

ഒരച്ഛന്റെ ആദിയോടെ അയാൾ ഡോക്ടറോട് കാര്യം തിരക്കി …..

” സർ ആദ്യം ഒന്ന് സമാധാനപ്പെടണം എന്നിട്ട് ഞാൻ പറയുന്നത് ശ്രദ്ധയോടെ കേൾക്കണം …. ”