പത്താം 👹 തീയാട്ട്

Author : Sajith

[ Previous Part ]

കഴിഞ്ഞ പാർട്ടിൽ ചിലർക്കെങ്കിലും ഒന്നു രണ്ട് കഥാപാത്രങ്ങളോട് വിരക്തി തോന്നിയിരിക്കാം. അവര് അപ്രധാന കഥാപാത്രങ്ങളാണ്. ഇത് കുഞ്ഞൂട്ടൻ്റെയും അപ്പുവിൻ്റെയും കഥയാണ്. 

 

യാതൊരു വിധ രാഷ്ട്രീയവും പ്രോത്സാഹിപ്പിക്കുന്നില്ല. ആരെയും വിമർശിക്കാനും നിൽക്കുന്നില്ല.. പൊതു രാഷ്ട്ര ആശയ തലങ്ങളിലെ വിഭാഗങ്ങളെ കടം കൊണ്ടിരിക്കുന്നു. ഒന്നും വ്യക്തിപരമല്ലാ…

 

ഈ കഥയിൽ ലോജിക്കിന് പ്രസക്തിയില്ല

 

പത്താം 👹 തീയാട്ട്

★★★————★★★

 

 പാലേമാട് കോളേജ്..

**************************

 

ഒരു സെമസ്റ്റർ ഏകദേശം തീരാനായിരുന്നു. യൂണിവേഴ്‌സിറ്റിയുടെ മൊത്തത്തിലുള്ള ഒരു അയഞ്ഞ മട്ട് കാരണം പരീക്ഷകളെല്ലാം തോന്നിയ രീതിയിലാണ് നടന്ന് കൊണ്ടിരുന്നത്. 

 

ആദ്യ സെമസ്റ്റർ അവസാനിക്കുമ്പോൾ തേർഡിയറിന് സപ്ലീ എക്സാമുകളാണ് നടന്നിരുന്നത്. റിസൾട്ട് വരാനും സമയം ഒരുപാട് എടുത്തിരുന്നു. 

 

ആദ്യസെമസ്റ്ററിൻ്റെ അവസാനത്തോടെയാണ്.. യൂണിയൻ ഇലക്ഷൻ തുടങ്ങുന്നത്. അതുവരെ വലതുപക്ഷ ചിയ്വുള്ള വിദ്യാർത്ഥി സംഘടന കോളേജ് യൂണിയൻ കൈകാര്യം ചെയ്തു. 

 

അനസ് വന്ന് ഒരു കൊല്ലത്തിന് ശേഷമാണ് ഇടതുപക്ഷ ചായ്വുള്ള വിദ്യാർത്ഥി സംഘടനയ്ക്ക് ഒരു അടിത്തറ വരുന്നത്. പരസ്പരം ഗ്രൂപ്പുകളിയും ഷോ ഓഫും മാത്രമായി നടന്നിരുന്ന യൂണിറ്റിനെ അവൻ കോ ഓർഡിനേറ്റ് ചെയ്തു. 

 

ഒരു വർഷം ഏരിയാ കമ്മറ്റിയിൽ പ്രവർത്തിച്ചത് കൊണ്ട് പാർട്ടി ബ്രാഞ്ച് കമ്മറ്റിയുടെ സപ്പോർട്ട് കിട്ടി. വളർന്നു വരുന്ന ഒരു ശക്തനായ പാർട്ടിക്കാരനെ അവർ അവനിൽ കണ്ടിരിക്കാം. പാർട്ടിയുടെ വാക്കിന് മീതെ ഒരു ഗ്രൂപ്പിസവും തലപൊക്കാൻ ധൈര്യം കാണിച്ചില്ല..

 

അതുവരെ ബാലികേറാമല പോലെ നിന്നിരുന്ന കോളേജ് യൂണിയൻ തിരിച്ചു പിടിക്കണമെന്ന് മാത്രമാണ് അനസിനോടവർ ആവശ്യപ്പെട്ടത്. അഞ്ചു വർഷത്തോളം കോളേജ് ഇലക്ഷനിൽ നിലം തൊടീക്കാത്ത ഒരു സംഘടനയാണെന്ന് കൂടി ഓർക്കണം.