പത്താം ? തീയാട്ട് [Sajith] 214

അങ്ങനെ ഇരിക്കെ ഒരു ദിവസം.., തോട്ടത്തിൽ തെങ്ങിന് വളം ഇടുന്ന ജോലിക്കാരെ ശ്രദ്ധിക്കുകയായിരുന്നു പീതാംബരൻ. അവർക്ക് വേണ്ട നിർദ്ദേശങ്ങളും മറ്റും നൽകുന്നു ഇടക്ക് പണി ശരിയാവാത്തതിന് വഴക്ക് പറയുന്നു. ഒരു ചെറിയ മാടമ്പിത്തരം ഒക്കെ കൂടി കലർന്ന ഒരു സ്വഭാവമാണ് അയാൾക്ക്. 

ദൂരെ നിന്ന് ഒരു കുടയും കക്ഷത്തിലൊരു ഡയറിയും വച്ച് നടന്നു വരുന്ന അബുവിനെ പീതാംബരൻ ശ്രദ്ധിച്ചു. നല്ലൊരു ആലോചന നോക്കാൻ പറഞ്ഞിട്ട് ആഴ്ച മൂന്ന് കഴിഞ്ഞു. അവസാനം കണ്ടപ്പൊ വഴിചെലവിന് മൂവായിരവും വാങ്ങി പോയതാണ്. 

പീതാംബരൻ വേണ്ട നിർദ്ദേശങ്ങൾ കൊടുത്ത് അബുവിൻ്റെ അടുത്തേക്ക് ചെന്നു. 

പീതാംബരനുള്ള സന്തോഷ വാർത്തയും കൊണ്ടാണവൻ വന്നിരിക്കുന്നതെന്ന് ബോധിപ്പിച്ചു. കൂടെ ഡയറി തുറന്ന് ഒരു ഫോട്ടോയും കുടുംബത്തിൻ്റെ വിവരങ്ങളും കൈമാറി. അബു പറഞ്ഞിടത്തോളം വല്ല്യ കുടുംബക്കാരാണ്. നാല് തലമുറയായിട്ട് ഉണ്ടാക്കിയെടുത്ത സൽപ്പേര്. കുടുംബത്തിലെ പലരും ഉന്നതപദവിയിലിരിക്കുന്നു. ചെറുക്കൻ സവക്കാർ ഉദ്യോഗസ്ഥൻ. ഇത് തൻ്റെ മോളുടെ ഭാഗ്യമാണ് പീതാംബരൻ കണക്ക് കൂട്ടി. അയാള് സന്തോഷത്തിൻ്റെ പുറത്ത് ഒരു രണ്ടായിരം രൂപകൂടി അബൂന് കൊടുത്തു. അബു അത് വേണ്ടെന്നൊക്കെ പറഞ്ഞ് ചെറിയ മടിപോലെയൊക്കെ കാണിച്ച് തലയൊക്കെ ഒന്ന് ചൊറിഞ്ഞ് കൊണ്ട് അത് വാങ്ങി തൻ്റെ വരയൻ ട്രൗസറിൻ്റെ പോക്കറ്റിൽ തിരുകി.

വേറെ ഒന്നു രണ്ട് സ്ഥലത്ത് കൂടി കയറാനുണ്ടെന്ന് പറഞ്ഞ് അയാൾ പോവാൻ തിരക്ക് കൂട്ടി. പോവാൻ നേരത്ത് തിങ്കളാഴ്ച ചെറുക്കൻ്റെ വീട്ട് കാര് വരണം എന്നു പറഞ്ഞെന്നും അറിച്ചു. 

പീതാംബരൻ ഭാര്യ സുമിത്രയോട് കാര്യം പറഞ്ഞു കൂടെ സന്തോഷിനോടും. അവന് ആകെ കൂടെ ദേഷ്യം വരുന്നുണ്ടായിരുന്നു. കഴിഞ്ഞ ആഴ്ച രതീഷിൻ്റെ കാര്യം പറഞ്ഞതിന് അച്ഛനൊന്നും  മിണ്ടിയിരുന്നില്ല.., അപ്പൊ ഇങ്ങനൊരു കാര്യം തീരുമാനിച്ചത് കൊണ്ടാണ് മറുപടി പറയാഞ്ഞതെന്ന് സന്തോഷിന് ബോധ്യമായി. 

ശ്വേതയോട് കാര്യങ്ങൾ അറിയിക്കാൻ പീതാംബരൻ സുമിത്രയെ ആണ് ഏൽപ്പിച്ചത്. അവർക്കും ശ്വേതയെ രതീഷിന് കൈപിടിച്ചേൽപ്പിക്കണം എന്നായിരുന്നു. എന്നാൽ പിടിവാശിക്കാരനായ ഭർത്താവിനോട് ഒന്നും പറഞ്ഞിട്ട് കാര്യമില്ലെന്ന് അവർക്ക് മനസിലായി. ദയനീയമായി അവര് സന്തോഷിനെ ഒന്ന് നോക്കി. എങ്ങനെ ഈ കാര്യം മോളോട് പറയും എന്നവർ കുഴഞ്ഞു. പെണ്ണുകാണലിനുള്ള ഒരുക്കങ്ങൾ നടത്താൻ മകൻ സന്തോഷിനോട് പറഞ്ഞു. അച്ഛനോട് രതീഷിൻ്റെ കാര്യം പറയണം എന്നുണ്ട് പക്ഷെ അയാളുടെ സ്വഭാവം വച്ച് ഇങ്ങനൊരു സാഹചര്യത്തിൽ ഒരു അടി കിട്ടിയേക്കാം. എന്നാലും കൊഴപ്പില്ല പെങ്ങളുടെ ജീവിതമാണ് വലുത് അവള് സന്തോഷമായിട്ട് ഇരിക്കണം.., സന്തോഷ് കണക്ക് കൂട്ടി.

പുഴയിൽ നിന്നു വരുന്ന പാത്തിയിൽ നിന്ന് തെങ്ങിൻ തോപ്പിലേക്ക് വെള്ളം തിരിക്കുന്ന തിരക്കിലായിരുന്നു പീതാംബരൻ. സന്തോഷ് അച്ഛനോട് ഈ ആലോചന ഒഴിവാക്കണമെന്നും അമ്മായിയോട് സംസാരിച്ച് ശ്വേതയുടെയും രതീഷിൻ്റെയും വിവാഹം നടത്തണമെന്നും ആവശ്യപ്പെടാനായി അവിടേക്ക് വന്നു.