പത്താം ? തീയാട്ട് [Sajith] 214

കുഞ്ഞൂട്ടനും അനിയും ഉരുളൻ കല്ലുകൾ താണ്ടി എൻഡിങ്ങിലെത്തി. മുമ്പേ പോയവരെല്ലാം അവിടെ നിൽക്കുന്നുണ്ട്. പാപ്പിയും ജോൺസനും ശരത്തും ഓരോ സിഗരറ്റ് കത്തിച്ച് വലിക്കുന്നു. ചുറ്റും ജാതി തോട്ടം.. പിന്നെ റോഡിന് അരികിലൂടെ ഒഴുകുന്ന കുഞ്ഞി തോടും. ഇവ രണ്ടുമല്ലാതെ ആ പ്രദേശത്ത് ഒറ്റ മനുഷ്യ കുഞ്ഞുങ്ങൾ പോലുമില്ല. അനി ബൈക്ക് ഒരു ജാതിമരത്തിന് ചോട്ടിൽ ഒതുക്കി നിറുത്തി. കുഞ്ഞൂട്ടനും അനിയും ഭാക്കി ഉള്ളവരും കൂടി വെള്ള ചാട്ടം ലക്ഷ്യമാക്കി നടന്നു. 

കുഞ്ഞൂട്ടൻ കൈയ്യിലെ വെള്ളം ശരിത്തിന് കൊടുത്തു. കൊറച്ച് മടിച്ചാണങ്കിലും ശരത്ത് അത് വാങ്ങി. കുപ്പി പിടിച്ചവർക്ക് ഒരു പെഗ്ഗ് കൂടുതലെങ്ങാൻ കിട്ടിയാലോ.. എന്നാണവൻ ചിന്തിച്ചത്. ഏതോ കൂതറ റമ്മിൻ്റെ ഒരു ലിറ്റർ ബോട്ടിൽ ജോൺസൻ്റെ അണ്ടർ വയറിൽ സുരക്ഷിതമായിരുന്നു.

കാട്ടിൽ കയറുന്നതിന് മുൻപ് തന്നെ അടുത്തുള്ള പൊടുകണ്ണി മരത്തിൽ മഞ്ഞബോർഡിൽ ഫോറസ്റ്റ് ഡിപ്പാർട്ട്‌മെന്റ് ചില നിർദ്ദേശങ്ങളും മറ്റും എഴുതി വച്ചിരുന്നു. 

മഴക്കാലമാണ് എന്നാലും ശക്തികുറഞ്ഞ് അടുത്ത സീസണിലേക്ക് കടക്കാൻ തുടങ്ങിയിരുന്നു പ്രകൃതി. ചവിട്ടുന്നിടം നിറയേ പച്ചപുല്ലുകൾ വളർന്ന് പടർന്ന് കിടക്കുന്നു. പാതയുടെ രണ്ട് ഭാഗത്തും രണ്ടാൾ ഉയരത്തിൽ വളർന്ന് പടർന്ന് കിടക്കുന്ന വള്ളിപടർപ്പുകൾ. വെളിച്ചം അടിച്ചാൽ അതിനകത്ത് കൂടി കടത്തി വിടുക കൂടി ചെയ്യില്ല. അത്രയ്ക്ക് കെട്ടി വരിഞ്ഞ് ഇഴുകി പടർന്ന് കിടക്കാണ്. അതിനകത്ത് എന്തങ്കിലും അനക്കം കേൾക്കുമ്പൊ ചെറുതായി പേടി തോന്നും. എന്നാൽ മിക്കവാറും അത് വല്ല കുരങ്ങുകളോ പക്ഷികളോ മറ്റോ ആയിരിക്കും. 

കലക്കൻ പുഴയുടെ അരിവ് ചേർന്നാണ് മൺപാത. കാട്ടിനകത്ത് കൂടി ഒരു നാലഞ്ച് കിലോമീറ്റർ പോയി കഴിഞ്ഞാൽ കലക്കൻ പുഴയുടെ ഉത്ഭവം കാണാം.. അങ്ങ് ദേവാലയിലെ അഞ്ചോ ആറോ ചോലകൾ ചേർന്ന് നാലഞ്ച് കിലോമീറ്റർ സഞ്ചരിച്ച് വരുമ്പോൾ ഒരു പുഴയായി രൂപം പ്രാപിക്കുന്നു. പാറകളിലും മുളംകൂട്ടങ്ങളിലും മറ്റും തട്ടി വരുന്ന വെള്ളത്തിന് ഇളം മുളംകൂമ്പിൻ്റെയോ പൂഴി മണലിൻ്റെയോ ചൊയ ആണ്.

ഒരു പത്തൻപത് വർഷം മുൻപ് വരെ പുഴയിലിറങ്ങി സ്വർണ്ണം അരിച്ചിരുന്നത് പലർക്കും ജീവിത മാർഗ്ഗമായിരുന്നു. അന്ന് പുഴ കലങ്ങി മറിഞ്ഞാണ് ഒഴുകിയിരുന്നത്. 

കുഞ്ഞൂട്ടനും ബാക്കി ഉള്ളവരും വെള്ളച്ചാട്ടം ലക്ഷ്യമാക്കി നടന്നു. ഏകദേശം ഒന്നര കിലോമീറ്റർ കാട്ടിനകത്തേക്ക് നടന്നാൽ വെള്ളച്ചാട്ടത്തിലെത്താം. ഗൂഗിൾ മാപ്പിൻ്റെ സഹായത്തോടെ ലൊക്കേഷൻ നോക്കിയാൽ ചിലപ്പൊ അവര് നിൽക്കുന്നത് തമിഴ്നിട്ടിലായിരിക്കും. 

ഫ്രഷ് ആനപിണ്ഠം കിടക്കണ കണ്ടപ്പോൾ എല്ലാവരും ഒന്ന് സൈലൻ്റായി. ആനചൂര് കാറ്റിൽ പരന്നു കിടക്കുന്നു. അങ്ങിങ്ങായി  ചില്ലകൾ ഇളകുന്ന ശബ്ദം കേൾക്കാം. മാനംമുട്ടുന്ന കാട്ട് അത്തിമരത്തിലൂടെ കുരങ്ങന്മാർ ചാടി കളിക്കുന്നതാണത്. അവ അത്തിക്കായ പറിച്ച് പാതി കഴിച്ച് നിലത്തേക്കിടും. ഒരു മനുഷ്യൻ്റെ കാലടിയുടെ ശബ്ദമായിരിക്കും അവ ജീർണിച്ച ഇലകളിലേക്ക് വന്ന് വീഴുമ്പോൾ.