പത്താം ? തീയാട്ട് [Sajith] 214

ഒരാഴ്ച അറ്റൻ്റെൻസ് ഒന്നും ഇല്ലാത്തതോണ്ട് കോളേജിൽ വന്നില്ലെങ്കിലും കൊഴപ്പൊന്നുമില്ല. കുഞ്ഞൂട്ടന് പെട്ടന്ന് ഇന്ദിരാമ്മയുടെ അടുത്ത് പോകാം എന്നാണ് തോന്നിയത്. കുറച്ച് കാലമായില്ലേ അങ്ങോട്ടൊക്കെ ഒന്ന് പോയിട്ട്. അമ്മയെ കാണണം എന്ന് മോഹവുമുണ്ട്. 

കുഞ്ഞൂട്ടൻ അപ്പൂനോട് പറഞ്ഞപ്പൊ അവൾക്ക് ഫെസ്റ്റിവലിൻ്റെ ഇൻചാർജും മറ്റുമായി തിരക്കാണെന്നറിയിച്ചു. അങ്ങനെ കുഞ്ഞൂട്ടൻ ഒറ്റയ്ക്ക് പോവാൻ തീരുമാനിച്ചു. 

പാപ്പിയും ജോൺസനും ഒരാഴ്ച്ചത്തേക്ക് കുടിച്ച് കൂത്താടാൻ തന്നെ തീരുമാനിച്ചു. അഞ്ചു ദിവസം അഞ്ച് കുപ്പി. ലോക്കലാണങ്കിലും എല്ലാ ദിവസവും കുപ്പി എടുക്കണം എന്ന് തന്നെ തീരുമാനിച്ചു. ചോദിച്ചപ്പോൾ ശരത്തിനും ലിജിനും അനിക്കും ഓക്കെ കുഞ്ഞൂട്ടന് ഇങ്ങനെ ഒരു യാത്രയുണ്ടെന്ന് പറഞ്ഞ് ഒഴിഞ്ഞു. കണ്ണന് പിന്നെ ഇതൊക്കെ അലർജിയാണ്. പിന്നെ അതിനുള്ള പിരിക്കലായി.., നിവർത്തിയില്ലാതെ കുഞ്ഞൂട്ടനും കൊടുത്തു ഒരു അഞ്ഞൂറുരൂപ. ബാഡ് ഡെപ്റ്റ് ആയി അത് അപ്പത്തന്നെ തള്ളികളയേം ചെയ്തു.

**************

ചുങ്കത്തറ 

************

സന്തോഷിൻ്റെ അച്ഛൻ പീതാംബരൻ മോൾക്ക് പറ്റിയൊരു ആലോചനയുമായി വരാൻ ബ്രോക്കർ അബുവിനോട് ആവശ്യപ്പെട്ടിരുന്നു. അബു അതിനായി അന്വേഷണം തുടങ്ങി കഴിഞ്ഞിരുന്നു. 

ശ്വേതയ്ക്ക് രതീഷിനെ ഇഷ്ടമാണെന്നുള്ള കാര്യമെല്ലാം അയാൾക്കറിയുന്ന കാര്യം തന്നെ. കാര്യം പെങ്ങളുടെ മോനൊക്കെ തന്നെ ശരി. പക്ഷെ പണത്തിൻ്റെ സ്ഥാനത്ത് ബന്ധമൊക്കെ നോക്കീട്ടെന്തു കാര്യം. പണത്തിന് പണം തന്നെ വേണ്ടേ. അവനാണങ്കിൽ ഒരു ജോലിയും കൂലിയുമില്ല. ഒരു പഴയ ഹെർക്കുലീസിൻ്റെ സൈക്കിളിൽ നാട് തെണ്ടലല്ലേ ജോലി. അങ്ങനെയുള്ള ഒരുത്തന് എങ്ങനെ മോളേ പിടിച്ച് കൊടുക്കും. അവളെ ഒരു കുറവും അറിയിക്കാതെയാണ് വളർത്തിയത്. അവൻ്റെ വീട് തന്നെ ഒരു കൊണം ഇല്ല ചെറിയ ഒരു ഓഡിട്ട വീട്. ഇങ്ങനെ എണ്ണിയാലൊടുങ്ങാത്ത കുറ്റങ്ങളുണ്ടായിരുന്നു രതീഷിന് പീതാംബരൻ്റെ മനസിൽ. സ്വന്തം മോൾടെ ഭാവി സംരക്ഷിക്കുക എന്നാണ് അയാളും കണക്ക് കൂട്ടിയിരുന്നത്. എന്നാൽ പോവുന്നിടത്ത് അവൾക്ക് പൊന്നിനേക്കാൾ വിലയുള്ള സമാധാനവും സ്നേഹവും കിട്ടുമോ എന്ന് അയാള് നോക്കിയില്ല. നല്ലൊരു ബന്ധം കിട്ടുമ്പോൾ രതീഷിനെ അവൾ മറക്കും സന്തോഷമായി ജീവിക്കും എന്നതാൾ ഉറപ്പിച്ചു. പക്ഷെ സന്തോഷിൻ്റെ ചിന്ത വേറെയായിരുന്നു. രതീഷിൻ്റെയും അമ്മായിയുടെയും കൂടെയാണെങ്കിൽ പെങ്ങളെന്നും സന്തോഷവതിയായിരിക്കുമെന്ന് അവന് ഉറപ്പുണ്ടായിരുന്നു.