നിയോഗം 2 Dark World (മാലാഖയുടെ കാമുകൻ) 1525

ബെഡിൽ കിടന്നു കരഞ്ഞു.. എത്ര കഷ്ടപ്പെട്ടാണ് അവളെ ഒന്ന് പ്രേമത്തിൽ വീഴ്ത്തിയത്? ഏട്ടൻ അല്ലാതെ ഒരാൾ ഈ ശരീരത്തിൽ തൊടണമെങ്കിൽ സഞ്ജന മരിക്കണം എന്ന് പറഞ്ഞവൾ ആണ്…. ചതിച്ചില്ലേ?
അതൊക്കെ ആലോചിച്ചു ജോൺ എപ്പോഴോ ഉറങ്ങിപ്പോയി..

സമയം 7 മണി..

ഡോർ ബെൽ കേട്ട് ഉറക്കം ഞെട്ടി വാതിൽ തുറന്ന ജോൺ സഞ്ജനയെ ആണ് കണ്ടത്.. അതെ ഇളം റോസ് സാരി..

“ഏട്ടാ…”

അവൾ അവന്റെ നെഞ്ചിൽ വീണു കെട്ടിപിടിച്ചു.. അവൾക്ക് വല്ലാത്തൊരു തണുപ്പ്.. ജോൺ എന്താ പറയേണ്ടത് എന്നറിയാതെ അനങ്ങാതെ നിന്നു..

“എന്താ ഏട്ടാ? മുഖം വല്ലാതെ ഇരിക്കുന്നത്?”

അവൾ ചോദിച്ചു..

“ഇല്ല ഒന്നും ഇല്ല.. യാത്ര കഴിഞ്ഞു വന്നതല്ലേ..? നീ കുളിച്ചു ഫ്രഷ് ആയിക്കെ…ഞാൻ ഉറങ്ങിപ്പോയി…”

ജോൺ മെല്ലെ പറഞ്ഞു ഒപ്പിച്ചു. അവന്റെ ഹൃദയം പൊട്ടുന്ന അവസ്ഥ ആയിരുന്നു.

“ശരി.. ആം ടയേർഡ് ആസ് ഡെഡ്..”

അവൾ മുകളിലേക്ക് പടി കയറി.. ഇവൾ ഇങ്ങനെ ഇംഗ്ലീഷ് ഉപയോഗിക്കാറില്ലല്ലോ..

ജോൺ കുറച്ചു നേരം ആലോചിച്ചു നിന്ന ശേഷം പുറകെ ചെന്നു..

അവളുടെ സാരി നിലത്തു കിടക്കുന്നു… ഇന്നേഴ്സ് മേശയുടെ മുകളിൽ.

ഇവൾ ഇങ്ങനെ ചെയ്യാറില്ലല്ലോ? ജോൺ ആലോചിച്ചു..

കണ്ടവന്റെ കൂടെ കിടന്നു വന്നവൾക്ക് എന്ത് വൃത്തി?

അവൾ കുളിക്കുന്ന ശബ്ദം കേൾക്കുന്നുണ്ടായിരുന്നു.. അവളെ ഇപ്പോൾ തന്നെ അങ്ങ് കൊന്നാലോ? അവൻ ആലോചിച്ചു..

വേണ്ട.. ഒരുമിച്ചു പിടിക്കണം.. വീട്ടിൽ കയറുന്നതേ കണ്ടുള്ളു..
അവൻ പുച്ഛത്തോടെ ആലോചിച്ചു മേശയിൽ ഇരുന്ന ഫോൺ എടുത്തു ബാല്കണിയിലേക്ക് ചെന്നു..

കൂടുതൽ തെളിവ് വേണം…

അവന് അവനോടു തന്നെ പുച്ഛം തോന്നി.. ഭാര്യയുടെ അവിഹിതത്തിന്റെ തെളിവ് കണ്ടുപിടിക്കണം.. എന്തൊരു ജന്മം.

അവന്റെ ഫോൺ ശബ്‌ദിച്ചു.. അവന്റെ തന്നെ വേറെ ഒരു കൂട്ടുകാരൻ ആണ്.. സജി.

“ഡാ ജോണെ.. നീ എവിടെ ആണ്? എത്ര നേരം ആയി വിളിക്കുന്നു??”

പരിഭ്രമം നിറഞ്ഞ ശബ്ദം..

“വീട്ടിൽ…ഞാൻ ഉറങ്ങിപ്പോയി…. എന്താ?”

“നീ ഒന്നും അറിഞ്ഞില്ലേ?”

“എന്ത് ഇല്ല?? കാര്യം പറ..”

“ഡാ… അർജുൻ.. പിന്നെ ഡെന്നിസ്.. രണ്ടുപേരെയും ആരോ കൊന്നു…. “

ജോൺ വിറച്ചു…

“തമാശ പറയല്ലേ പട്ടി.. ഡെന്നിസ് എന്റെ ഒപ്പം ഉണ്ടായിരുന്നു…”

ജോൺ വിറച്ചു കൊണ്ട് പറഞ്ഞു..

“തമാശ അല്ല ജോൺ… “

സജി കരഞ്ഞുകൊണ്ടാണ് അത് പറഞ്ഞത്..

“സത്യമാണോ? ഡാ… നീ…”

“അതേടാ… നീ വാ… വേഗം….ഞങ്ങൾ ഡെന്നീസിന്റെ ഇവിടെ ഉണ്ട്….”

ഫോൺ കട്ട് ആയി…
ജോൺ മൃതശരീരൻ ആയി നിന്നു.. ഡെന്നിസിനെ കൊന്നു എന്നോ? ആര്? അവൻ അർജുനെ കാണാൻ പോകുന്നു എന്നല്ലേ പറഞ്ഞത്??