💘 അരികത്തായാരോ – 7 💘 വിച്ചു [ ചെകുത്താനെ സ്നേഹിച്ച മാലാഖ ] 1836

ഒന്നും മനസ്സിലാകാതെ ദേവു അവളോട് കാര്യമെന്തെന്ന് തിരക്കി … അഹാന മുഖത്തൊരു പുഞ്ചിരി വരുത്തിയ ശേഷം ഒന്നുമില്ല എന്ന അർത്ഥത്തിൽ തലയാട്ടി …. അവർ തിരികെ മുറിയിലേക്ക് പോകാൻ തുടങ്ങിയതും വീണ്ടും ദൂരെ നിന്ന് ബുളളറ്റിന്റെ ശബ്ദം കേട്ട് അഹാന വീണ്ടും റോഡിലേയ്ക്ക് തിരിഞ്ഞ് നോക്കി ….

                           …………………………

” എന്താടാ അഹാനയുടെ വീടിന് മുന്നിൽ കൂടി റോന്ത് ചുറ്റാനാണോ നീ രാത്രി എന്നെയും വിളിച്ചോണ്ട് വന്നത് .. നീ വണ്ടി നിർത്ത് …. ”

യദു വാശി പിടിച്ചതും അജു ബുള്ളറ്റ് അഹാനയുടെ വീട്ടിലേയ്ക്ക് പോകുന്ന ഇന്റർലോക്ക് പതിപ്പിച്ച വഴിയിലേയ്ക്ക് കയറ്റി നിർത്തി …. യദു വേഗം താഴെയിറങ്ങി ദേവുവിന്റെ ഫോണിലേയ്ക്ക് വിളിച്ചു ….

” നീ ആരെയാ വിളിക്കുന്നേ …. ? ”

” അഹാനയെ കാണാനല്ലേ നീ ഇവിടെ കിടന്ന് കറങ്ങുന്നത് …. ”

യദു അതും പറഞ്ഞ് ഫോൺ കോളിലേയ്ക്ക് ശ്രദ്ധിച്ചു . വീടിന്റെ ബാൽക്കണിയിൽ നിൽക്കുന്ന അഹാനയും ദേവുവും ഇതെല്ലാം കാണുന്നുണ്ടായിരുന്നു . യദുവിന്റെ കോൾ വന്നതും ദേവു വേഗം കോളെടുത്തു ….

” ദേവു അതെ …. ”

” നീ ഒന്നും പറയണ്ട , എനിക്ക് എല്ലാം മനസ്സിലായി …. അവിടെ കിടന്ന് കറങ്ങാതെ ഇങ്ങോട്ട് നോക്ക് . യദൂ….. വീടിന്റെ ബാൽക്കണിയിലേയ്ക്ക് നോക്കാൻ … ”

ദേവു പറഞ്ഞത് കേട്ട് യദു തലയുയർത്തി മുകളിലേയ്ക്ക് നോക്കി അപ്പോഴാണ് വീടിന്റെ ബാൽക്കണിയിലായി ദേവുവും അഹാനയും നിൽക്കുന്നത് അവൻ കണ്ടത് . ദേവു അവന് നേരെ കൈ വീശി കാണിച്ചു …

” ടാ അങ്ങോട്ട് നോക്ക് …. ”