? ഋതുഭേദങ്ങൾ ?️ 15 [ഖല്‍ബിന്‍റെ പോരാളി ?] 837

വിജയദശമിയുടെ അന്ന് അമ്പലത്തില്‍ വെച്ചായിരുന്നു മാളുട്ടിയെ എഴുത്തിനിരുത്തിയത്. അവളെ കൂടാതെ എട്ടോ ഒമ്പതോ കുട്ടികള്‍ കുടെ ആ അവസരത്തില്‍ ഹരിശ്രീ കുറിച്ചിരുന്നു. അധികം ആര്‍ക്കും കിട്ടാത്ത ഒരു സൗഭാഗ്യം അന്ന് മാളുട്ടിയ്ക്ക് കിട്ടി. ബാക്കി കുട്ടികളെ അപേക്ഷിച്ചു സ്വന്തം അച്ഛന്റെ മടിയില്‍ ഇരുന്നു ഹരിശ്രീ കുറിക്കാനുള്ള ഭാഗ്യമായിരുന്നു അവള്‍ക്ക് കിട്ടിയത്. പല കുട്ടികളും കരഞ്ഞു വാശി പിടിച്ചെങ്കിലും മാളുട്ടി അച്ഛന്‍ പറഞ്ഞത് എറ്റുപറഞ്ഞു വിദ്യാരംഭം കുറിച്ചു. അന്ന് വായനശാലയില്‍ വിദ്യാരംഭത്തിന്റെ പല കലാപരുപാടികളും മറ്റുമുണ്ടായിരുന്നു. ദേവും അമ്മുവും മാളുട്ടിയെയും കൊണ്ട് ഒന്ന് പോയി കുറച്ചുനേരം അവിടെ ചിലവഴിച്ചു. രാത്രി ഇങ്ങനെ നടന്നൊരു യാത്ര അനഘയ്ക്കും മാളുട്ടിയ്ക്കും ഒരു പുതിയ അനുഭവമായിരുന്നു.

പിറ്റേന്നായിരുന്നു കോളേജില്‍ ചേരാനായി ഹൈദരാബാദിലേക്ക് പോക്കേണ്ടിരുന്നത്. ഇരുപത് മണിക്കുറോളം വരും അങ്ങോട്ടുള്ള ട്രെയിനിലെ യാത്ര. കാര്യങ്ങള്‍ തിരുമാനം ആയപ്പോ ദേവേട്ടന്‍ ആദ്യം ചെയ്തത് ടിക്കറ്റ് ബുക്ക് ചെയ്തത് ആയിരുന്നു. ട്രെയിനിലെ ബോറിംഗ് സമയം മുഴുവന്‍ ചിലവഴിക്കാനുള്ള കാര്യങ്ങളുമായായിരുന്നു ദേവും അമ്മുവും യാത്രയ്ക്ക് പുറപ്പെട്ടിരുന്നത്. മാളുട്ടിയ്ക്ക് ഈ ട്രെയിന്‍ യാത്ര തന്റെ ആദ്യ അനുഭവമായിരുന്നു. ആദ്യമെല്ലാം അവര്‍ അത് ഗംഭീരമായി ആസ്വദിച്ചു പോന്നിരുന്നു. പിന്നെ അമ്മയുടെയും അച്ഛന്റെയും കുടെ കളിച്ചും ചിരിച്ചും ഒന്നിച്ചിരുന്നു ഭക്ഷണം കഴിച്ചും നന്നായി കിടന്നുറങ്ങിയും ഈ സമയം അവര്‍ തള്ളി നിക്കി.

പിറ്റേന്ന് പതിനൊന്ന് മണിയോടെയാണ് അവര്‍ ഹൈദ്രാബാദിലെത്തിയത്. അവിടെനിന്ന് ഇരുപത് മിനിറ്റോളം സമയത്തെ ടാക്സി ഡ്രൈവിംങുണ്ടായിരുന്നു യൂണിവേഴ്സിറ്റിയിലേക്ക്. മറ്റു പ്രശ്നങ്ങളൊന്നും ഉണ്ടാവാത്തത് കൊണ്ട് അന്ന് യൂണിവേഴ്സിറ്റി അടയ്ക്കും മുമ്പ് രജിസ്ട്രഷന്‍ പൂര്‍ത്തിയാക്കി. പിന്നെ മറ്റൊരു ടാക്സിയില്‍ ആ ഫ്ലാറ്റ് തപ്പി ഇറങ്ങി.

അല്‍പം കറങ്ങേണ്ടി വന്നു ഫ്ലാറ്റ് കണ്ടെത്താന്‍. എന്നാലും നേരം ഇരുട്ടും മുമ്പ് അതും കണ്ടെത്തി. ഫ്ലാറ്റില്‍ ക്ലീനിംഗിനെല്ലാം വരുന്ന സര്‍വെന്റിനെ കണ്ടെത്തി കീ വാങ്ങി. അമേരിക്കയിലുള്ള ദേവേട്ടന്റെ കസിന്‍സ് അവരോട് വിളിച്ചു പറഞ്ഞിരുന്നു. അതുകൊണ്ട് വേറെ ചോദ്യോത്തരങ്ങളൊന്നുമുണ്ടായില്ല. മാസത്തിലൊരിക്കലെ അവിടെ ക്ലീനിങുള്ളു. അതിനാല്‍ തന്നെ ദേവും കുടുംബവും ആ ഫ്ലാറ്റിലേക്ക് കയറുമ്പോ അവിടം അത്യാവശ്യം പൊടിയെല്ലാം പിടിച്ചിരുന്നു. എന്നാലും ഒറ്റനോട്ടത്തില്‍ അനഘയ്ക്ക് സ്ഥലം ഇഷ്ടമായി. നാലാം നിലയിലാണ് ഫ്ലാറ്റ്. രണ്ട് അറ്റാച്ച്ഡ് ബെഡ്റൂമും കിച്ചണും ഹാളും ഉള്ള അത്യാവശ്യം സൗകര്യമെല്ലാമുള്ള ഫ്ലാറ്റ്. പോരാത്തതിന് കോളേജ് ക്യാമ്പസിലേക്ക് ഇവിടെ നിന്ന് അരമണിക്കുര്‍ നടക്കാനെ ഉള്ളു. അസോസിയേഷന്‍ പ്രസിഡന്റിനെ കണ്ട് കാര്യങ്ങളെല്ലാം സംസാരിച്ചു.