? ഋതുഭേദങ്ങൾ ?️ 15 [ഖല്‍ബിന്‍റെ പോരാളി ?] 837

““ഇവള്‍ പരിചയമില്ലാത്തവരുടെ അടുത്തേക്ക് പോകാനോ സംസാരിക്കാനോ നില്‍ക്കാറില്ല. അങ്ങിനെയുള്ളവര്‍ എടുക്കാനോ മറ്റോ നോക്കിയ അവള്‍ ഓടി എന്റെയോ ദേവേട്ടന്റെയോ അടുത്തേക്ക് ഓടും….”” അനഘ മാളുട്ടിയുടെ സ്വഭാവം പറഞ്ഞു. കുറച്ചുനേരം അവിടെ മറ്റു സംസാരമൊന്നുമുണ്ടായില്ല. അത്രയും നേരം കൊണ്ടു വിളമ്പിയ ചോറ് മുഴുവന്‍ മാളുട്ടിയെ കൊണ്ട് അനഘ കഴിപ്പിച്ചു.

““ഞാന്‍ ഇവളുടെ വാ കഴുകിച്ചു വരാം…. പേരശ്ശി വിഷമിക്കണ്ട…. ഒന്ന് രണ്ടു മണിക്കൂറൊണ്ട് നമ്മുക്ക് ഇത് ശരിയാക്കാം….”” അനഘ പേരശ്ശിയെ നോക്കി കൊണ്ട് പറഞ്ഞു. ശേഷം മാളുട്ടിയെയും കൊണ്ട് വാഷ്ബേസിനടുത്തേക്ക് ചെന്നു.

““അതാരാ മ്മേ….?”” മാളുട്ടി വാഷ്ബേസിനടുത്ത് വെച്ചു അനഘയോട് ചോദിച്ചു.

““അതോ… അത് അമ്മേടെ പേരശ്ശിയാ കണ്ണാ….””

““പേരശ്ശിയോ…?””

““ഹാ കണ്ണാ…. കണ്ണന്റെ മുത്തശ്ശന്റെ ഓപ്പോളാ അത്….”” അനഘ ബന്ധം വ്യക്തമാക്കി കൊടുത്തു. പക്ഷേ മാളുട്ടി മനസിലാവാത്ത പോലെ അനഘയുടെ മുഖത്തേക്ക് നോക്കി നിന്നു.

““കണ്ണാ…. അമ്മ ദൂരെ പോയി പഠിച്ച് വന്നാ മാളുട്ടിയ്ക്ക് ഒരു അനിയന്‍കുട്ടനെ തരൂലെ…. അപ്പോ കണ്ണനും കണ്ണന്റെ അനിയന്‍കുട്ടനും എങ്ങനെയാണോ അതെപോലെയാ മുത്തശ്ശനും ആ പേരശ്ശിയമ്മയും.”” അനഘ ഒന്നുടെ പറഞ്ഞു മനസിലാക്കി… മാളുട്ടി കുറച്ച് നേരം ആലോചിച്ച് നിന്നു.

““അപ്പോ…. മുത്തശ്ശന്റെ അമ്മ ദൂരെ പഠിക്ക്യാ പോയാണോ മുത്തശ്ശന്‍ ഉണ്ടായേ….?”” മാളുട്ടി ചോദിച്ചു. അതുകേട്ട് അനഘയ്ക്ക് ചിരിക്കാതെയിരിക്കാന്‍ പറ്റിയില്ല… അത്രയ്ക്കുണ്ടായിരുന്നു മാളുട്ടിയുടെ ആ ചോദ്യവും അവളുടെ നിഷ്കളങ്ക നോട്ടവും…

““അതോക്കെ അമ്മ പിന്നെ പറഞ്ഞു തരാട്ടോ…. ഇപ്പോ നമ്മുക്ക് കുറച്ചു നേരം പേരശ്ശിയമ്മയോട് സംസാരിക്കാം….”” മാളുട്ടിയെ എടുത്ത് ഒക്കത്തിരുത്തി അനഘ പേരശ്ശിയുടെ അടുത്തേക്ക് നടന്നു. കുറച്ചധികം നേരം അനഘയും പേരശ്ശിയും സംസാരിച്ചിരുന്നു. പഠിക്കാന്‍ പോകുന്നതിനെ പറ്റിയായിരുന്നു ചര്‍ച്ചയധികവും. മാളുട്ടി അമ്മയുടെ ഒക്കത്തിരുന്നു എല്ലാം കേട്ടിരുന്നു. ഒന്നും മനസിലാവുന്നില്ലെങ്കിലും പേരശ്ശിയോട് അമ്മ കാണിക്കുന്ന ബഹുമാനവും അമ്മയോട് പേരശ്ശി കാണിക്കുന്ന സ്നേഹവുമെല്ലാം അവള്‍ കാണുന്നുണ്ടായിരുന്നു. പേരശ്ശി ഇടയ്ക്ക് അവളെ നോക്കുമ്പോ ഒന്നുമറിയത്തവരെ പോലെ മാളുട്ടി മുഖം മറച്ചു അമ്മയുടെ ദേഹത്ത് ഒളിക്കും… അനഘയും പേരശ്ശിയും ഇതുമറിയുന്നുണ്ടായിരുന്നു.

കുറച്ചു കഴിഞ്ഞപ്പോ പേരശ്ശി സ്നേഹത്തോടെ മാളുട്ടിയെ എടുക്കാനായി വിളിച്ചപ്പോള്‍ മാളുട്ടി അമ്മയെ അനുവാദത്തിനായി നോക്കി. അനഘ സമ്മതിച്ചതോടെ ഒരു സംശയത്തോടെ പേരശ്ശിയുടെ കുടെ പോയി. കുറച്ചുനേരം കൊണ്ടു തന്നെ മാളുട്ടി പേരശ്ശിയുമായി അടുപ്പത്തിലായി. മാളുട്ടിയ്ക്ക് പായസം വേണമെന്ന് പറഞ്ഞപ്പോ പായസം കൊടുത്തതെല്ലാം പേരശ്ശിയായിരുന്നു.