🕉️ശിവശക്തി 13🕉️ [ പ്രണയരാജ] 339

അപ്പൂ……

അപ്പൂ…………

താമരയിൽ നോക്കിയ അവൾ കണ്ടത് അപ്പുവിനെ തന്നെയായിരുന്നു. എന്നാൽ അവളെ അതിശയിപ്പിച്ചത് മറ്റൊന്നായിരുന്നു. അപ്പൂ… എന്നവൾ വിളിച്ചതിനു പിറകെ , ആ പ്രകാശം പരത്തുന്ന പെൺകുട്ടിയും അപ്പൂ… എന്നു വിളിച്ചതിൻ്റെ പൊരുളറിയാതെ കാർത്തുമ്പി അവളെ തന്നെ നോക്കി നിന്നു.

അവൾ പതിയെ വെള്ളത്തിലേക്ക് ഇറങ്ങി നടന്നു. അപ്പുവിനെ ലക്ഷ്യമാക്കി അവൾ നിങ്ങവെ , ജലനിരപ്പും ഉയർന്ന പോലെ, അവൾ കഴുത്തറ്റം വെള്ളത്തിലാണ്, നിമിഷങ്ങൾക്കകം അവൾ വെള്ളത്തിൽ ഒളിച്ചു , ഒരമ്പരപ്പോടെ കാർത്തുമ്പി അവിടേക്കു നോക്കി നിൽക്കെ, അവളുടെ കൈകൾ ഉയർന്നു വന്നു കർത്തുമ്പിയെ മാടി വിളിച്ചു.

ഭയന്നു പിന്നോക്കം പോകാൻ ഒരുങ്ങിയ കാർത്തുമ്പിയെ തേടി അപ്പുവിൻ്റെ കരച്ചിൽ വന്നതും ആ കാലുകൾ നിശ്ചലമായി. ഉള്ളിൽ നിന്നും ഏതോ ഒരു ശക്തി തന്നെ ആ കുളത്തിലേക്കു ക്ഷണിക്കുന്നതായി അവൾക്കു തോന്നി. അവളാ കുളം ലക്ഷ്യമാക്കി നടന്നു.

തണുത്ത ജലത്തിൽ കാലുകൾ വെച്ച് അവൾ പതിയെ മുന്നോട്ടു നടന്നു. അപ്പുവിൻ്റെ കരച്ചിൽ അവൾക്ക് ഊർജം പകർന്നു. പതിയെ പതിയെ അവളും ജലത്തിനടിയിലായി. അടിത്തട്ടിലെ കാഴ്ച്ചകൾ അവൾക്കു നന്നായി കാണാം. ശ്വാസതടസ്സം നേരിടാത്തത് അവൾക്ക് അത്ഭുതം പകർന്നു.

അടിത്തട്ടിൽ ഒരിടത്തു നിന്നും പ്രകാശരശ്മികൾ അവളെ തേടിയെത്തി. ആ ഭാഗത്തേക്കു നോക്കിയപ്പോ ഒരു പെൺക്കുട്ടി ചമ്രം പടിഞ്ഞിരുന്നു. ജലത്തിനടിയിൽ ധ്യാനം ചെയ്യുന്നു. അവൾ പതിയെ അവൾക്കരികിലേക്കു നടന്നു നീങ്ങി.

അവൾക്കു മുന്നിൽ എത്തിയതും അവളുടെ മുഖം വ്യക്തമാകാത്തതു പോലെ, അടുത്ത ക്ഷണം അവൾ കണ്ണു തുറന്നതും കാർത്തുമ്പി പറഞ്ഞു.

ഞാനോ…..

അടുത്ത ക്ഷണം അവളുടെ വായിൽ ജലം കയറി, ശ്വാസം കിട്ടാതെ പിടഞ്ഞവൾ മുകളിലേക്കുയരാൻ ശ്രമിച്ചു.