🕉️ശിവശക്തി 13🕉️ [ പ്രണയരാജ] 339

മാനിനു പിറകെ ഓടിയോടി, കാടിൻ്റെ ഉള്ളിലേക്കാൾ പാഞ്ഞു കയറി.
പെട്ടെന്ന് സൂര്യൻ അസ്തമിച്ചതു പോലെ, ചുറ്റും അന്ധകാരം പരന്നു. ആ മാനിനെ കാണാൻ സാധിക്കുന്നില്ല. ഇരുളിലും കാൽപ്പെരുമാറ്റം കേൾക്കാൻ സാധിക്കുന്നുണ്ട്.

ദൂരെ ചെറിയൊരു പ്രകാശം പ്രതീതമായി, ഭയമുണ്ടെങ്കിലും അവൾ ആ പ്രകാശത്തെ തേടി, കാലടി വെച്ചു. അടുക്കും തോറും ആ പ്രകാശം തെളിയുന്നതായി അവൾ മനസിലാക്കി. അവളുടെ കാലുകൾക്ക് വേഗം വർദ്ധിച്ചു.

ദൂരെ വെളുത്ത വസ്ത്രമണിഞ്ഞ ഒരു യുവതി, അവളുടെ അംഗലാവണ്യങ്ങൾ അവർണ്ണനീയമാണ്, അവളിൽ നിന്നാണ് ഈ പ്രകാശരശ്മികൾ പ്രകാശം പരത്തുന്നത്. സ്വയം ജ്വലിക്കുന്ന ജോതിയായി അവൾ കാണപ്പെട്ടു. അവളെ കാണുമ്പോ കാർത്തുമ്പിക്കു പറഞ്ഞറിയിക്കാനാവാത്ത സന്തോഷം.

അവൾക്കു ചുറ്റും നുറുങ്ങു വെട്ടവുമായി മിന്നാമിനുങ്ങുകൾ പാറി പറയുകയാണ്. ആ വനത്തിലെ അന്ധകാരത്തെ തന്നിലെ പ്രകാശരശ്മികൾ കൊണ്ട് അടിയറവു പറയിപ്പിച്ച്. ആ ചെറു കീടങ്ങളുമായി അവൾ കളിച്ചു രസിക്കുകയാണ്.

മിന്നി, മിന്നി  മറയും,

മിന്നാമിനുങ്ങേ…….

ഈ കേളി ഗൃഹത്തിൽ

കൂട്ടു വരുമോ……

അവളിൽ നിന്നും പൊഴിയുന്ന സംഗീതം അവിടെയാകെ ഒഴുകി നടന്നു. ഒരു സ്വർഗീയ അനുഭൂതി . അവളാ പാട്ടിനൊത്ത് ചുവടു വെച്ചു തുടങ്ങിയതും ദൂരെ നിന്നും ഒരു ശലഭം പാറി വരുന്നത് കർത്തുമ്പി കണ്ടു. ഇരുളിലും തെളിയുന്ന ശലഭം .

സ്വയം പ്രകാശം പരത്താൻ കഴിവുള്ള ആ ശലഭം, തിളക്കമേറിയ ചിറകുകൾ വീശി , ആ കന്യകയെ ലക്ഷ്യമാക്കി പാറി വരുമ്പോ… പ്രകാശത്താൽ തീർത്ത വിസ്മയ കാഴ്ച്ചകൾ കാർത്തുമ്പി കാണുവാൻ ഇടയായി. ചുവടുകൾ വെക്കുന്ന ആ കന്യകയ്ക്കു ചുറ്റും വട്ടമിട്ടു പറക്കുകയാണ് ആ ശലഭം.