?️ശിവശക്തി 13?️ [ പ്രണയരാജ] 340

അവൾ തൻ്റെ ചുവടുകൾ നിർത്തി, പതിയെ കൈകൾ മുന്നോട്ടു നീട്ടി വെച്ചു. ആ ശലഭം പതിയെ പതിയെ പാറി വന്ന് അവളുടെ കൈകളിൽ വന്നിരുന്നു. ആ ശലഭം ഇരുന്നതും കന്യക തൻ്റെ കൈകൾ പതിയെ ഉയർത്തി, മുഖത്തിനു നേരെ കൊണ്ടു വെച്ചു. അവൾ ആ ശലഭത്തോട് കൊഞ്ചുകയാണ്.



അടുത്ത ക്ഷണം ശലഭം അവളെ വിട്ട് പറന്നുയർന്നു. ആ കന്യക, ശലഭത്തെ പിടിക്കാനായി ചാടി നോക്കി. എന്നാൽ ശലഭം അതിൽ നിന്നെല്ലാം ഒഴിഞ്ഞു മാറി, മുന്നോട്ട് കുതിച്ചു. ശലഭം പാറിയകലുന്നത് കണ്ടതും ആ കന്യകയും അതിനെ പിടിക്കാനായി, മുന്നോട്ടു പാഞ്ഞു . അതു കണ്ടതും അവർക്കു പിറകെ കാർത്തുമ്പിയും പാഞ്ഞു.

ദൂരങ്ങൾ പിന്നിടവേ… കാർത്തുമ്പിയെ വരവേറ്റത് , ഒരു വലിയ പ്രകാശമാണ്, അടുക്കും തോറും മിഴികൾ അടപ്പിക്കുന്ന തീവ്ര പ്രകാശം. മിഴികൾ അടച്ചു പിടിച്ച് കൊണ്ടു തന്നെ അവൾ ആ പ്രകാശ വലയത്തിൽ പ്രവേശിച്ചു. കുറച്ചു ദൂരം പിന്നിട്ടവൾ, അവിടെ നിശ്ചലയായി നിന്നു. തൻ്റെ മിഴികൾ തുറക്കാതെ അവൾ കാത്തിരുന്നു.

കിളികളുടെ കളകളാരവം അവിടെയാകെ അലയടിച്ചു. കണ്ണിനു ചൂടു പകർന്ന പ്രകാശ തീവ്രത കുറഞ്ഞ പ്രതീതി അവളിലുണർന്നു. അവൾ പതിയെ മിഴികൾ തുറന്നു. അവൾക്കു മുന്നിലെ കാഴ്ചകൾ അവളെ കൂടുതൽ ആശ്ചര്യചകിതയാക്കി.

തനിക്കു മുന്നിൽ നീണ്ടു കിടക്കുന്ന പാത, ആ പാതയുടെ ഇരു വശവും പടർന്നു പന്തലിച്ച വൃക്ഷങ്ങൾ, ശിഖിരങ്ങളാൽ തീർത്ത മറയിൽ ,സുര്യ കിരണങ്ങളിൽ നിന്നും പ്രകൃതി ചോല തീർത്തിരിക്കുന്നു. ഹരിതകത്താൽ തീർത്ത ആകാശത്തിലെ മറപടലത്തിലൂടെ മണ്ണിനെ തേടി ഇരച്ചു കയറുന്ന പ്രകാശരഷ്മികൾ, ഹരിതകത്തിൽ ചാലിച്ച വർണ്ണശഭളമാം കാഴ്ച്ചകൾ കൊണ്ട് വിരുന്നേകിയിരുന്നു. പാതയുടെ തെളിയുന്ന അവസാന ഭാഗത്ത് ശക്തമായ വെളിച്ചം തെളിഞ്ഞു കാണുന്ന പ്രതീതി.



ആ പാതയിലൂടെ , പ്രകൃതിയൊരുക്കിയ വിസ്മയങ്ങൾ ആസ്വദിച്ച്, കാർത്തുമ്പി എകയായി നടന്നകലുകയാണ്. താൻ നടന്നകലുന്നത് എവിടേക്ക് എന്ന ചിന്ത അവൾക്കിപ്പോ ഇല്ല, ഭയത്തിൻ്റെ നേരിയ അംശം പോലും ആ മുഖത്ത് പ്രകടമല്ല. തികഞ്ഞ സന്തോഷത്തോടെ, വർദ്ധിച്ച ആത്മവിശ്വാസത്തോടെ പ്രകൃതിയൊരുക്കിയ വിസ്മയക്കാഴ്ച്ചയിൽ ലയിച്ച് സ്വയം മറന്ന് മുന്നോട്ടു നീങ്ങുകയാണ്.

ആ പാതയുടെ അന്ത്യം അവളെ വരവേറ്റത് മറ്റൊരു ലോകത്തേക്കാണ്, ഭൂമിയിൽ ഒരു സ്വർഗ്ഗമുണ്ടെങ്കിൽ അത് ഇതാണ്, അവളുടെ മനസ് പതിയെ മന്ത്രിച്ചു. കുറച്ചു മുന്നെ താൻ കണ്ടതൊന്നും പ്രകൃതി സൗന്ദര്യത്തിൻ്റെ പത്തിലൊന്നു പോലുമല്ല എന്നു തോന്നിക്കുന്ന വിതം പ്രകൃതി മനോഹരിത അവളെ വരവേറ്റു.