💞💞 അവൾ രാജകുമാരി-4 💞💞 [ ചെകുത്താനെ സ്നേഹിച്ച മാലാഖ ] 624

ഏകദേശം ക്ഷേത്രങ്ങൾക്കും തൊട്ടടുത്ത് ഉള്ളതുപോലെ വളർന്ന് പന്തലിച്ച ഒരു വലിയ ആൽമരം ആ ക്ഷേത്രത്തിന്റെ പുറത്ത് ഉണ്ടായിരുന്നു . ചുറ്റും കരിങ്കൽകെട്ട് കൊണ്ട് സംരക്ഷണ ഭിത്തിയൊക്കെ ഉള്ള വലിയ ഒരു ആൽ മരം . പുറത്ത് ഇറങ്ങിയ രാഹുൽ ആൽമരത്തിന്റെ ചുവട്ടിലെ കരിങ്കൽ കെട്ടിൽ ഇരുപ്പ് പിടിച്ചു. ചുറ്റും ഒന്ന് നോക്കി പ്രകൃതിയുടെ സൗന്ദര്യം ആസ്വദിച്ച് ശുദ്ധമായ വായുവും ശ്വസിച്ച് അങ്ങനെ ഇരുന്നപ്പോൾ അവന് എന്തോ ഒരു പോസിറ്റീവ് എനർജി ഫീൽ ചെയ്യുന്നത് പോലെ തോന്നി . ചുറ്റും ഒന്ന് കണ്ണോടിച്ചപ്പോൾ ക്ഷേത്രത്തിൽ നിന്ന് തൊഴുത് മടങ്ങുന്ന
ചില പെൺകുട്ടികൾ തന്നെ നോക്കി നടന്ന് പോകുന്നത് രാഹുൽ കണ്ടു . ഇത് കണ്ട രാഹുൽ ഉടനെ നോട്ടം മാറ്റി ……

അപ്പോഴാണ് തന്റെ അടുത്തേക്ക് നടന്നു വരുന്ന ഒരാളെ രാഹുൽ കണ്ടത് . ഒരു അൻപത് അൻപത്തഞ്ച് വയസ്സ് തോന്നിക്കുന്ന ഒരാൾ . ധരിച്ചിരിക്കുന്നത് ഒരു പേശയും ഷർട്ടും അത് പലയിടത്തും കീറിയിട്ടുണ്ട് മാത്രമല്ല അത് വളരെ മുഷിഞ്ഞതുമാണ് , നഗ്നമായ പാദങ്ങൾ , പാറി പറക്കുന്ന തലമുടി . ഒറ്റനോട്ടത്തിൽ കണ്ടാൽ ഒരു ഭ്രാന്തനന്നേ ആർക്കും തോന്നു .

അയാൾ രാഹുലിന്റെ അടുത്ത് കൂടെ നടന്നു പോയി , രാഹുൽ അയാളുടെ മുഖത്തേക്ക് ഒന്ന് നോക്കി , അയാൾ തിരിച്ചും . രാഹുലിന്റെ മുഖത്തേക്ക് നോക്കിയ അയാൾ ബ്രേക്ക് ഇട്ടതു പോലെ നിന്നു . അയാൾ രാഹുലിന്റെ മുഖത്തേക്ക് സൂക്ഷമമായി ഒന്നുകൂടെ നോക്കി .

തന്നെ എതോ ഒരു അന്യഗ്രഹ ജീവിയെപ്പോലെ അയാൾ നോക്കുന്നത് കണ്ടപ്പോൾ രാഹുലിന്റെ മനസ്സിൽ അൽപം ഭയം കയറി കൂടി ….

‘ ഇങ്ങേരുടെ നോട്ടം അത്ര പന്തിയല്ലല്ലോ ….. എന്നെ ഉപദ്രവിക്കാനുള്ള പ്ലാൻ വല്ലതും ആണോ ഇങ്ങേർ ആലോചിക്കുന്നത് , ഈ ഭ്രാന്തൻമാർക്ക് ശക്തി കൂടുതൽ ആണെന്ന് കേട്ടിട്ടുണ്ട് , പണിയാകുമോ … അകത്ത് നിന്നാൽ മതിയായിരുന്നു ….. ‘

രാഹുൽ മനസ്സിൽ ഓരോന്ന് ആലോചിച്ച് അങ്ങനെ ഇരുന്നു