💞💞 അവൾ രാജകുമാരി-4 💞💞 [ ചെകുത്താനെ സ്നേഹിച്ച മാലാഖ ] 624

” അതേ …. അമ്മേ …. ഈ ചേട്ടായി …..”

അത് കേട്ട ഗീതു ഉടനെ വീണ്ടും അമ്മയെ വിളിച്ചു . ഇത് കണ്ട രാഹുൽ ഉടനെ റൂമിലേക്ക് ഓടി . റൂമിൽ പോയി ഫ്രഷായി ഒരു പ്ലെയിൻ ചുവപ്പ് ഷർട്ടും മുണ്ടും ധരിച്ച് റെഡിയായ ശേഷം രാഹുൽ താഴേക്ക് വന്നു.

” അപ്പൊ പറഞ്ഞാൽ അനുസരിക്കാൻ അറിയാം . ”

രാഹുലിനെ കണ്ട ഉടൻ ഗീതു പറഞ്ഞു .
രാഹുൽ മറുപടിയൊന്നും പറയാതെ പുറത്തേക്ക് ഇറങ്ങി ബുള്ളറ്റിൽ കയറി ബുള്ളറ്റ് സ്റ്റാർട്ട് ചെയ്യാൻ നോക്കി പക്ഷെ എത്ര ശ്രമിച്ചിട്ടും ബുള്ളറ്റ് സ്റ്റാർട്ട് ആകുന്നില്ല …… രാഹുൽ പണിപ്പെട്ട് ബുള്ളറ്റ് സ്റ്റാർട്ട് ആക്കാൻ ശ്രമിക്കുന്നത് കണ്ട ഗീതു അകത്ത് നിന്ന് കാറിന്റെ ചാവി എടുത്ത് കൊണ്ട് പുറത്തേക്ക് വന്നു.

” അത് ചത്ത് കാണും കാറിൽ പോകാം , ഈ പുരാവസ്തുവിനെ വിറ്റിട്ട് വേറെ മേടിക്കാൻ പറഞ്ഞാൽ ആര് കേൾക്കാൻ . ”

ഗീതു താക്കോൽ ഉപയോഗിച്ച് കാർ അൺലോക്ക് ചെയ്ത ശേഷം താക്കോൽ രാഹുലിന്റെ കയ്യിൽ കൊടുത്തിട്ട് പറഞ്ഞു . ഗീതു നേരെ കാറിന്റെ ഫ്രണ്ട് സീറ്റിൽ കയറി രാഹുൽ ഡ്രൈവിങ് സീറ്റിലും ……

രാഹുലിന്റെ വീട്ടിൽ നിന്നും കുറച്ച് അകലെ ഉള്ള ഒരു ശ്രീകൃഷ്ണ ക്ഷേത്രം അവിടേക്കാണ് അവരുടെ യാത്ര . ഗീതുവിന് ഏറെ ഇഷ്ടപ്പെട്ട ക്ഷേത്രം ….. അതുകൊണ്ടാണ് അൽപം ദൂരം കൂടുതലായിട്ടും അവിടേക്ക് പോകുന്നത് , അതും മാസത്തിൽ ഒന്നോ രണ്ടോ വട്ടം …..

” ചേട്ടായി എന്നോട് പിണക്കം ആണോ ? ”

ഒന്നും മിണ്ടാതെ കാർ ഡ്രൈവ് ചെയ്യുന്ന രാഹുലിനെ നോക്കി ഗീതു ചോദിച്ചു.

” എന്തിന് ? ഞാൻ ചുമ്മാ നിന്നെ ഒന്ന് ചൊടുപ്പിക്കാൻ വേണ്ടിയല്ലേ ക്ഷേത്രത്തിലേക്ക് വരുന്നില്ല എന്ന് പറഞ്ഞത് ….. ”

രാഹുൽ ഒരു പുഞ്ചിരിയോടെ പറഞ്ഞു .