യൂട്യൂബ് വ്ലോഗിങ് കില്ലർ [Elsa2244] 78

റാണ്ടി തൻ്റെ പദ്ധതിയെ കുറിച്ച് വീണ്ടും വീണ്ടും ട്വിറ്ററിൽ പോസ്റ്റുകൾ ചെയ്യാൻ ആരംഭിച്ചു. തൻ്റെ പ്രധാന അക്കൗണ്ടിന് പുറമെ തൻ്റെ കഥാപാത്രങ്ങളുടെ പേരിൽ നിർമ്മിച്ച അക്കൗണ്ടുകളിലും അവൻ പോസ്റ്റുകൾ ചെയ്യാൻ ആരംഭിച്ചു. താൻ നിർമ്മിച്ച മക്കിൻസീ എന്ന കഥാപാത്രം തൻ്റെ സോൾ മേറ്റ് ആന്നെന്നും താൻ അവളെ ഒരുപാട് സ്നേഹിക്കുന്നു എന്നും റാണ്ടി ട്വിറ്ററിൽ പോസ്റ്റ് ചെയ്തു.

തൻ്റെ കഥാപാത്രങ്ങളുടെ വ്യക്തിത്വം സ്വയം സ്വീകരിച്ചുകൊണ്ട് റാണ്ടി അവരുടെ ട്വിറ്റർ അക്കൗണ്ടിൽ നിന്ന് അവരാണെന്ന രീതിയിൽ പോസ്റ്റുകൾ ചെയ്യാൻ ആരംഭിച്ചു. അവരെല്ലാം പരസ്പരം സംസാരിക്കുന്ന രീതിയിൽ ആയിരുന്നു ഓരോ ട്വീറ്റുകളും പുറത്ത് വന്നത്.

താൻ ചെയ്യാൻ പോകുന്ന കൊടും കുറ്റത്തിൻ്റെ മുഴുവൻ പദ്ധതികളും ആണ് റാണ്ടി ഒരു പബ്ലിക് പ്ലാറ്റ്ഫോമിൽ പബ്ലിക് ആയി തന്നെ തൻ്റെ നിരവധി അക്കൗണ്ടുകളിലൂടെ വിളിച്ചു പറഞ്ഞത്. ഒരുപക്ഷേ ആ പോസ്റ്റുകൾ കണ്ട ആളുകൾ റാണ്ടിക്ക് തൻ്റെ കഥാപാത്രങ്ങളോട് ഉള്ള അടങ്ങാത്ത അഭിനിവേശം കൊണ്ടാകാം ഇത്തരം പോസ്റ്റുകൾ ചെയ്യുന്നത് എന്ന് തോന്നിയിരിക്കാം. പക്ഷേ റാണ്ടിയുടെ യഥാര്ത മാനസിക നില അത്തരം ഘട്ടങ്ങൾ എല്ലാം കടന്ന് ഒരുപാട് മുന്നോട്ട് പോയിരുന്നു.

താൻ മരണപ്പെട്ടാൽ തൻ്റെ കഥാപാത്രങ്ങളെ പോലെ ഒരു പ്രേത പെൺകുട്ടിയായി തിരികെ വരും എന്ന് റാണ്ടി അകമഴിഞ്ഞ് വിശ്വസിച്ചിരുന്നു. അവൻ പൂർണമായും ഒരു മായിക ലോകത്ത് അകപ്പെട്ടിരുന്നു.

ഒടുവിൽ റാണ്ടി തൻ്റെ വിധി നിശ്ചയിക്കാൻ തീരുമാനിച്ചു. ഒന്നുകിൽ തൻ്റെ സ്വന്തം വീടിൻ്റെ പരിസരത്ത് വച്ച് ആത്മഹത്യ ചെയ്യുക, അല്ലെങ്കിൽ സൂപ്പർമാർക്കറ്റിൽ പോയി ഒരു കൂട്ടക്കൊല നടത്തിയ ശേഷം ആത്മഹത്യ ചെയ്യുക. ഇതിനുള്ള തീരുമാനം റാണ്ടി എടുത്തത് ഒരു കോയിൻ ഫ്ളിപ്പിലൂടെ ആയിരുന്നു. ഹെഡ്സ് ആണോ ടെയിൽ ആണോ വീഴുന്നത് എന്ന് നോക്കി ഒരു തീരുമാനത്തിൽ എത്താം എന്ന് റാണ്ടി തീരുമാനിച്ചു. കോയിൻ ഫ്ലിപ്പ് ചെയ്യുന്ന വീഡിയോ അവൻ തൻ്റെ യൂട്യൂബ് ചാനലിൽ പോസ്റ്റ് ചെയ്യുകയും ചെയ്തു. നാണയ ഫ്ളിപ്പിങ്ങിൽ കൂടി സൂപ്പർമാർക്കറ്റിൽ കൂട്ടക്കൊല ചെയ്യാം എന്ന തീരുമാനത്തിൽ റാണ്ടി വന്നെത്തി.

തൻ്റെ അവസാന വീഡിയോ എന്ന പേരിൽ റാണ്ടി യൂട്യൂബിൽ ഒരു വീഡിയോ പോസ്റ്റ് ചെയ്തു. എല്ലാം അവസാനിക്കാൻ പോവുകയാണ് എന്നും ഇതിന് ശേഷം തൻ്റെ ചാനലിന് എന്ത് സംഭവിക്കും എന്നറിയില്ല എന്നും അവൻ ഈ വീഡിയോയിൽ പറയുന്നുണ്ട്. തന്നെ കുറിച്ച് ആളുകൾ എന്ത് പറഞ്ഞാലും തനിക്ക് പ്രശ്നമല്ല എന്നും അതിനെ കുറിച്ച് താൻ ബോധവാൻ അല്ല എന്നും റാണ്ടി കൂട്ടിച്ചേർത്തു. സൂപ്പർമാർക്കറ്റിൽ എല്ലാവരും സന്തോഷത്തിൽ ആണെന്നും പക്ഷേ അടുത്ത ദിവസങ്ങളിൽ അവരുടെ ജീവിതം തന്നെ തലകീഴായി മറിയാൻ പോവുകയാണ് എന്നും റാണ്ടി വീഡിയോയിൽ പറയുന്നുണ്ട്. ഒരുപക്ഷേ സൂപ്പർമാർക്കറ്റ് ഒരു മാസത്തേക്കോ മറ്റോ പൂട്ടിയിടാം എന്നും അല്ലെങ്കിൽ എന്നെന്നേക്കുമായി അടച്ച് പൂട്ടും എന്നും റാണ്ടി പ്രതീക്ഷിച്ചിരുന്നു. നിങ്ങൾക്ക് വേണ്ട വിവരങ്ങൾ ഞാൻ ഇവിടെ ബാക്കി വച്ചിട്ടുണ്ട് എന്നും ബാക്കിയുള്ളവ എൻ്റെ കൂടെ എൻ്റെ കുഴിമാടത്തിൽ ലയിച്ച് ചേരും എന്നുമാണ് റാണ്ടി പറഞ്ഞത്.